Sindicato SADA lo tene un reunion extraordinario pa atende algun asunto cu ta pasando. Den e reunion lo tende kico ta e decision cu lo bay tuma. Sr. Eduard Maduro ta splica mas tocante e reunion aki.
E reunion aki ta uno urgente y un di e motibonan ta cu nan tin algun luna caba cu ta purbando di haya un reunion cu minister di Finanza y minister president, cual no a logra. Esey ta pone cu sindicato mester yama un reunion, ya cu tin deadlinenan cu a vence, ya cu nan no a haya update mas di kico ta pasando. Ta trata di e acuerdo firma, unda cu e gobierno actual a bisa di lo respeta esaki. Na varios ocasion nan a purba di sinta na mesa cu e minister pa resolve e problemanan, pero lamentablemente, e minister en cuestion a bisa di no tin tempo pa sinta na mesa cu sindicato aworaki. Pa sindicato esey ta lamentabel, ya cu nan ta purba di tur manera pa sinta pa purba resolve e problemanan na mesa, cual no tabata tin oido di parti di minister di Finanzas, y e presion di parti di miembronan tambe ta birando mas y mas. Esaki ta motibo tambe cu nan a bin cu e reunion aki, pa asina scucha di nan y tambe informanan di e ultimo updatenan cu sindicato tin pa nan.
E reunion lo tuma luga diamars mainta 10 or, situa na e DA building, na e oficina principal. DI eynan lo haya sa kico ta e siguiente stapnan cu ta bay tuma. Logicamente tin proposicionnan pa trece na miembronan, ya cu sa pasa cu nan mes ta bin cu nan mesun ideanan, nan mesun proposicionnan pa asina conhuntamente dicidi kico ta bay ta e siguiente pasonan. Pero na final di e reunion di diamars, nan lo por tin un update di kico ta bay pasa.
For di reunion di maart cu sindicato ta buscando un manera pa reuni cu e minister di Finanzas. Durante maart, SADA tabata tin un ultimo reunion cu e minister, pa ta exacto dia 15 di maart. A keda palabra cu e minister cu ora cu nan caba di atende cu e presupuesto na april, e lo yama sindicato pa un reunion pa asina caba di atende cu e tur e puntonan cu ta colgando ariba mesa. Pero lamentablemente, despues di a manda pidi e minister pa un reunion, el a manda avisa sindicato cu e no tin tempo aworaki. Esaki a pone cu sindicato a keda manera zweef. Nan si tabata kier a reuni cu e minister.
Sr. Eduard Maduro a splica cu motibo pa cual nan no a acerca parlamento, ta pasobra cu nan tabata tin palabracionnan haci cu minister. Pero kisas esey ta bay ta nan proximo step, pero tur cos ta depende di nan miembronan.