Pa a logra un CAO no tabata facil pero si a logra pa e trahadornan bay padilanti, segun Sr. Rudy Geerman, miembro di Sindicato FTA.
Sr. Geerman a manda un palabra di gradecimento na miembronan di FTA, cu a pone nan confianza y tambe pa nan pasenshi ya cu e CAO cu nan tabata tin cu Manchebo Beach Resort a vence na 2016. Niun negociacion no ta facil, ya cu ta bay pa 4 aña y esey ta demostra stabilidad.
Esey ta algo cu FTA ta kere aden, y pesey nan a firma un CAO pa 4 aña cu lo trece un stabilidad enorme, paso e trahado kico e lo ricibi e proximo 4 añanan y na su turno, compania sa kico ta e gastonan di e proximo 4 aña. Dus e por presupuesta su gastonan. Algo masha importante ora di firma un CAO largo, ta e stabilidad.
Esaki ta e prome e CAO cu nan a firma pa cuater aña apesar cu tres aña pasa cu Manchebo Beach Resort tabata un di e prome hotelnan cu a bay di acuerdo, a kere den 5 dia di trabao. E trahadonan pa aña tabata traha 6 dia pa siman, pero 3 aña pasa, e trahadonan a bay di 6 pa 5 dia, manteniendo e salario di 6. Esey tabata un adelanto enorme, ya cu e trahadonan tin dos dia cu nan ta off, consecuentemente nan por sosega miho y e ora tambe nan por wak na e hotel, e cantidad di hendenan cu ta bay cu AO a baha. E trahadonan tin mas descanso, y esey tabata kiermen cu e compania mester a emplea mas trahado pa cumpli cu e dianan ey.
FTA ta calcula cu nan ta bay pa 4 aña y trahadonan ta bay pa 13% di aumento directo den nan salario, reparti den 4 aña.
Na momento cu e trahadonan tin cierto cantidad di aña di servicio, compania ta reconoce esey y esey tambe FTA a logra aumenta den tur e bracketnan. Algo masha importante ta cu nan a mehora e condicionnan di trabao den housekeeping. Tambe nan a introduci tambe locual nan ta yama un kassiertoelage, caminda cu compania ta reconoce esey na momento cu tin cualkier diferencia, e ta wordo kita for di esey.
Pa locual cu ta e sector di F&B, a logra traha ariba e minimun point, ya cu nan ta traha hopi cu e 15% di service charge. Dus ora no tin hopi business, aunke na Manchebo ta stabiel, e ora e trahadonan no ta bay mucho atras den salario.
Un di e puntonan, segun Sr. Geerman, cu a mehora tabata e servicio di bril. Pero pa FTA ta hopi importante, ta cu compania a compronde e caminda cu e sindicato kier bay, unda nan a introduci un service allowance. Y aki a corda ariba trahadonan cu añanan largo, sin niun pensioen. Manchebo ta un di e prome hotelnan cu a drenta na momento cu FTA hutno cu AHATA a lanta e Pensioenfonds di Horeca.
Na cuminsamento, algun di e trahadonan no ta kere den pensioen. Hopi a pidi pa e placa di pensioen hinca esaki den nan salario, pero nan ta lubida cu nan ta yega edad di pensioen.