Sr. Hubert Dirks a splica ariba e desaroyonan di e reunion y acuerdo pa loke ta RBC Bank cu awor tin un trankilidad.
E motibo pa cual trahadonan a pone trabao abao, ainda sindicato ta discutiendo cu gerencia, pa asina sea nan ta bay traha bek of lo yega na un areglo, un settlemente, depende si e trahado bay di acuerdo cu esaki. Asina e problema lo keda tras di lomba.
Loke ta importante ta cu tin un negocacion andando pa un CAO nobo pa un tempo caba y e trahadonan ta contento cu firma un CAO nobo, ya cu e beneficionan principal, e plan di spaar, a keda como un di e beneficionan cu e trahadonan di RBC a mantene.
Sr. Dirks a sigui splica cu despues di basta tempo ta negocia, a firma un CAO cu tin un duracion di tres aña. Pronto sindicato lo ta bek na mesa cu e banco, ya cu tempo ta pasa hop lihe.
E situacion economico di Aruba, di cual banconan ta depende di dje, si e keda stabiel y di otro banda, na momento cu banconan of den e caso aki, tin problema pa mantene mesun cantidad di trahado of si tin renobacion of cambio di sistema, sindicato lo haci’e di e miho forma cu e no ta bay afecta e trahado y cu e no ta bay tin frustracion cu mester yega asina leu cu ta yega na un conflicto.
Ohala cu e situacion por keda stabiel y cu no necesariamente lo bay yega na conflicto. Importante ta cu, hopi biaha despues cu trahadonan para trabao, e compania lo mira e foutnan miho. Hopi biaha ta comunicacion, segun Sr. Dirks, y despues di un bon comunicacion por bisa cu e situacion ta bin bek na normal. Y cu finalmente e trabao di e trahado ta importante, y e compani mester sa di duna e servicio e ora, pa su clientenan.
Pa e motibo ey sindicato ta spera cu e situacion keda stabiel y ta spera cu e lo tin menos problema posibel, di awo padilanti.
E pregunta ta keda, si e banco ta stabiel of si e trahado nan trabao ta stabiel, pero Sr. Dirks a bisa cu pa aworaki e situacion ta stabiel pero mirando cambionan na nivel mundial, no por descarta cu na cualkier momento cu lo por tin posibilidad di cambio di sistema atrobe. Ta pidi si e ora coherencia, pa loke bin, atende cu esaki na e miho manera posibel. Na un manera cu no ta bira un conflicto. Si e trahadonan por keda contento den un trato husto, pasobra no necesariamente ora di cambia sistema, mester elimina trahado.
Sindicato ta kere cu tin espacio pa haci e partinan aki miho y esey di ambos partido lo atende pa den futuro e bay miho. Asina Sr. Hubert Dirks, di sindicato FTA a finalisa bisando.