Simposio ‘Organisando Calidad’ na Aruba: “Na caminda pa un agenda pa investigacion cientifico

Diaranson atardi, 5 di juni 2019 a tuma luga e simposio organisa pa e departamento di Universidad di Aruba, Organization, Governance and Management, miho conoci como OGM. E simposio tabata un encuentro cu profesional di diferente organisacion na Aruba. E departamento OGM a desaroya un concepto pa un agenda multidisciplinario pa investigacion cientifico na Aruba. E concepto aki ta forma a base di e tres pilarnan esta; Gobernacion, Comunidad & Cohesion y Servicio Publico. E meta di e investigacion den e ramo di e tres pilarnan aki ta, pa reenforsa Aruba door di provee perspectiva a base di investigacion cientifico. E strategia di e investigacion ta; identificacion di problema urgente y actual, identificacion di e miho practicanan global y local pa solucion y e implementacion di e miho practicanan aki.

A organisa diferente encuentro prome cu e simposio, cu colega di Universidad di Aruba y cu profesional di diferente organisacion durante preparacion pa e simposio. Durante e simposio a dialoga mas profundo tocante e areanan di investigacion, cu tabata consisti di tres diferente sesion simultaneo. Pa cada pilar a desaroya varios pregunta cu e profesionalnan ta identifica como importante y urgente pa investiga na Aruba.
A base di e preguntanan di investigacion, e team di OGM, hunto cu e profesornan W. Bakker y M.Noordegraaf lo desaroya un proposicion di investigacion pa e añanan academico 2019-2020 y 2020-2021. Den e proposicion aki lo specifica detayadamente riba topico di investigacion, enfoke, tempo, capacidad, producto y financiamento. E investigacion aki lo crea un base pa educacion (den forma di tarea den curso, pasantia y tesis) y investigacion door di colaboracion di entre otro, docente, studiante y alumni di Universidad di Aruba.

Ta gradici tur profesional cu a atende e simposio y cu a contribui cu nan experticio, conocemento, experiencia. Tambe ta gradici e ekipo completo di OGM, cu tabata presente pa contribui na e proyecto aki. Acerca ta gradici Dr. Glenn Thode, rector di Universidad di Aruba y Dr. Mieke de Droog, cu a fungi como key note speaker. Tur dos orador a enfatisa, desde di nan punto di bista, riba e importancia di investigacion cientifico y colaboracion na Aruba, pa asina por contribui na mehoracion di calidad di Gobernacion, Comunidad & Cohesion y Servicio Publico na Aruba.

Comments

comments