Juf. Madonna Stephens a bay laga nos, sinembargo pa hopi di nos, Madonna lo sigui
biba den nos curason pa semper; pa papia den palabranan filosofico di Henry Adams:
“A teacher affects eternity; he/she can never tell where his/her influence stops”.
Madonna por mira atras riba un trayectoria profesional impresionante como maestra di scol, tanto den enseñansa basico y secundario (Filomena College), como tambe superior (Instituto Pedagogico Arubano).
Madonna na un edad hoben a bay studia na Hulanda pa maestro di scol (Kweekschool na Reuver) y despues na Aruba mes a continua profesionalisa su mes den Idioma (Ingles), Pedagogia y Derecho. Motivacion principal di Madonna pa sigui profesionalisa su mes, no tabata simplemente pa un otro logro academico, pero mas bien pa por a eherce su funcion di ‘educado’ ainda miho! Nos como coleganan por a experencia e dedicacion y compromiso di Madonna pa enseñansa di Aruba constantemente.
Exactamente mesun rasonnan pa cua Madonna a cuminsa milita den sindicato di maestro di scol; na comienso VLA (Vakbond van Leerkrachten Aruba) y despues medio añanan 70, SIMAR (Sindicato di Maestronan Aruba). Prome cu Madonna a tuma rienda di SIMAR como presidente (1977 – 1984), Madonna a forma parti di diferente directiva y despues di su presidencia, a sigui activo como miembro di hopi directiva mas; pa hopi presidente di SIMAR, Madonna a fungi como nan mentor. E papel cu Madonna a desplega pa SIMAR ta enorme y hopi significativo, sigur den terminonan pa cu posicion huridico di tur maestro (miembro y no-miembro), como tambe den terminonan di desaroyo y inovacion di enseñansa na Aruba.
Madonna a fungi como miembro di Directiva VLA/SIMAR na 1974, por cierto durante e welga di “Inspraak” y e respectivo welganan despues. Tambe mi ta corda nos intercambionan pa cu preparacion pa e congresonan/seminarionan “Keda sinta: un mester?” y “Kalidad di enseñansa”. Madonna como dirigente responsabel, tabata semper presente, dia y nochi. Madonna no tabata un persona di hopi palabra, pero mas bien un bon observado y un analista hopi critico; respetando opinion di tur hende, Madonna tabata formula su propio pensamentonan. No semper Madonna a sa di convence tur hende, pero den mayoria caso, Madonna tabatin rason y como tal tabata para firme pa su principio y ponencianan: un profesional consciente y consistente.
Madonna a duna un man tambe den dos comision, esta: Stuurgroep Herstructurering Onderwijs (abrevia SHO), instala pa minister mr. Mito Croes, encarga cu e nota di maneho di enseñansa “Renovacion di Enseñansa: prioridad pa futuro” (1988).
Igualmente, “Werkgroep Herstructurering Opleidingsonderwijs” (WHO), instala tambe pa minister mr. Mito Croes y e nota di maneho di enseñansa “Het Pedagogisch Instituut: een nieuw instituut voor de scholing van onderwijsgevenden op Aruba” (1988).
Desde 1989/1990, Madonna y mi persona tabata colega-docente na IPA. Locual cu nos a propone na ideanan pa innovacion di e sistema educativo na Aruba, den e siguiente 20 pa 25 aña, a crea espacio pa ehecuta esakinan. Madonna a duna su contribucion incondicionalmente na tur proyecto di innovacion di enseñansa, esta: IPA, EPB, EPI, SHA y PRIEPEB.
Den e contexto aki, como colega directo di Madonna y na nomber di henter sector di enseñansa mas cu claro na nomber di SIMAR, mi ta expresa mi gratitud pa tur locual Madonna a significa pa nos enseñansa, pa su amistad y colegialidad. Masha masha danki!
Ohala cu demas autoridad educativo na Aruba, principalmente minister di enseñansa, por reconoce e trabaonan di Sra. Madonna Stephens como “Educador-Sindicalista Arubano” y duna Madonna un homenahe postumo pa henter su carera profesional.
SIMAR ta desea famia, colega y amistadnan hopi forza y consuelo.
Cu Madonna, sosega na paz.