E situacion ta asina cu docentenan a dicidi cu awe nan no ta drenta nan klas. Nan tin varios aña cu nan ta pidiendo pa haci cambio na e bentana y portanan, ya cu e calidad no ta sirbi. Bentananan no ta habri. Tin di nan cu nan haak ta kibra, portanan ta dal cera y no ta habri mas y e cos principal ta cu ta haci hopi calor. Pesey nan a dicidi cu nan no ta drenta, pasobra nan kier haya oido di esnan concerni pa bin cu cambio y palabracionnan fiho, kico ta bay tuma luga, pasobra cu hopi promesa a wordo haci y nan no a wordo cumpli, segun secretaria di Sindicato SIMAR, Maroushka Cornelie.
E scol mester di un structura miho pa aire circula na scol y airco, segun ‘Cornelie. Pa hopi aña caba ta cantando cu airco no ta un luho. Airco ta algo cu mester na tur scol di Aruba, no awe, sino ayera. Pero tambe e bentananan mester ta bon. Si un dia cu no tin coriente, cu mester habri bentana, e mester ta posibel. Simplemente tin pa bisa cu tur dos ta necesario.
Cornelie a sigui splica cu awor aki el a wordo yama door cu a dicidi cu nan ta pone trabao abao y el a bin pa sostene e docentenan. Loke cu Simar ta bay haci, ta cu tin cu sinta cu nan prome, pa wak kico nan ideanan ta, kico nan deseonan ta. Kico ta e pasonan cu nan lo tuma despues di awe, pasobra tin cu wak prome si minister lo yega. Y tambe pa wak kico ta bay wordo bisa na nan. A base di esey ta sinta cu nan pa wak kico nan kier haci proximamente. Ta mas cu cla cu e situacionnan aki no ta aceptabel mas. En berdad, ta bon cu nan a tuma e paso aki, pa haya e atencion necesario y ta bisa na veld eyfo, cu no por keda acepta cosnan asina, pasobra tanten cu ta acepta nan, tur cos ta great. Abo ta traha den e calor y no solamente abo, pasobra Simar ta para pa e trahado. Pero ta trahando den calor cu yiu di hende. Esey ta nifica cu ta aceptando abuso di bo alumno. Si ta calor, bentananan no ta habri y no bin bisa cu si tin un fan pasobra fan no ta traha si e bentana no ta habri pasobra no tin circulacion di aire. Tin cu stop di acepta e abusonan aki. Ta yama nos pais, pais di cinco strea, awel e scolnan mester ta di cinco strea. Y un scol caminda bentana no ta habri, caminda cu ta calor y muchanan ta sufri, esey no ta cinco strea, segun Cornelie.