Directiva di SIMAR ta hopi preocupa cu e situacion escalante y alarmante di falta di siguridad di nos maestronan den scolnan na Aruba. Nos tur ta consciente cu e Aruba, e alumno y e mayor di awor no ta esunnan di antes mas y cu nos mester tuma pasonan serio y lihe pa siguridad di tanto alumno y personal den nos scolnan.
Ta obvio cu maestronan ta rabia, disgusta y cu nan a ser sacudi pa e acontecimento di siman pasa, caminda un mayor a agredi un docente riba tereno di scol, den presencia di algun colega y alumno. Nos por a constata cu hopi maestro y a expresa nan frustracion via medionan social y a asta papia di “pone enseñansa plat” pa mustra nan mal contento.
SIMAR no a perde tempo y a manda invitacion pa tur directiva di scol pa ta presente na un reunion pa “brainstorm” hunto riba preocupacion-, proposicion- y solucionnan pa loke ta siguridad di nan maestronan.
E reunion aki lo tuma luga diahuebs 9 di maart 2017 pa 11:00 am den Sala Bruce Crispin na sede di Sindicato di Maestro di Aruba. Directiva ta spera cu tur directiva por ta representa na e reunion aki cual ta di suma importancia pa cu nan empleadonan y enseñansa en general.