Josephine Albertus di sindicato SIMAR ta splica nos cu en berdad siman pasa diabierna sindicatonan a wordo invita pa un reunion/cumbre informativo di gobierno, unda nan por bisa cu a wordo elabora riba situacion financiero di Aruba y tambe con leu nan ta riba e Landspakket actualmente.
Riba e parti financiero nos tur sa cu e situacion despues di covid19 a cuminsa bira hopi malo, y sindicatonan a haya un recapitulacion di e aña anterior kico tur a wordo brinda den ayudo, a wordo splica tambe riba e parti di ayudo humanitario, cu ta eigenlijk parti di Cruz Cora, Fundacion pa Nos Comunidad y CEDE. Nan a duna tambe informacion riba subsidio di salario, a papia tocante fase y sosten di companianan chikito. A toca riba e parti cu desde comienso di aña prome cu covid a bini, a mustra cu ya caba tabata duna sosten, y awo cu covid esaki a aumenta.
“A splica nos tambe cu yudansa humanitario ta algo cu Aruba mes lo tin cu cuminsa carga, y nan a splica nos tambe cu e ta basta placa – 30 miyon – y como sindicato SIMAR nos a puntra di unda ta saca esaki of con lo financi’e, MinFec a splica nos cu nan ta bezig cu ne evaluando kico por y kico no por,” segun sra. Albertus. Como docente, ta mirando cu e situacion social ta birando pio, y tur dia mas ainda anto esaki ta un preocupacion cua wordo treci dilanti na gobierno riba con lo yuda cu esaki. Tin yudansa di Fase, loonsubsidie, pero si wak e supermercadonan, e productonan no ta birando mas barata tampoco.
“Gobierno ta bezig cu ne y mi ta spera nan sigui pasobra si nos tur tin cu ta solidario, e ora tin cu wak pa comerciantenan tambe, mi ta compronde ta dificil pero si ta wordo bisa come saludabel etc anto e cosnan ta caro, ta bira fastioso,” segun sra. Albertus.