Caribbean Palm Village Resort a celebra Siman Internacional di Housekeeping, cu un cantidad di actividad disenja pa entretene, premia y malcria e miembronan di e departamento aki cu ta traha asina duro. Siman Internacional di Housekeeping, IEHA, ta wordo celebra rond mundo desde 1981, como un siman cu ta dedica pa enfoca tur atencion y reconocemento riba e housekeepernan profesional cu ta traha den hotelnan, resortnan y otro facilidadnan publico, manteniendo un ambiente mas limpi, sigur y sano pa nos tur, cada dia.
E siman yena cu accion a cuminsa cu Belkis Moreu di Moreu Facilitation, educando tur hende riba e Poder di Pensamento, dilanti un publico anima. Un otro dia a mira un discusion di Salud y Control cu IBISA, nos autoridad local di deporte, y despues, Sergio Wever di Be Safe 4 Life a haci un presentacion tocante seguridad, for di un punto di bista di housekeeping, y mas despues den e siman, e bingo anual popular a wordo hunga, cu hopi premio cu a wordo parti.