Ta trahando un plan pa loke ta e tema di seguridad na school nan pa cual di parti di sindicato Simar a sinta na mesa cu e directiva di scolnan pa asina lanta un comision pa asina cuminsa traha un plan pa trece esaki na gobierno segun Sra. Sheila Lazo- Tromp presidente di Simar ta splica.
Den pasado Simar e comision di siguridad di maestronan a bin cu diferente protocol, cu diferente proposicionnan. A keda traha ariba dje, a keda informa nan di nan mesun siguridad, nan siguridad emocional. Na Maart a yama tur e directiva di e scolnan pa bini hunto, pa delibera riba loke por haci, con e situacion actual ta. Un ex- miembro di Directiva cu a carga e comision Siguridad di Maestronan, a duna un proposicion. E ta willing pa sigui brainstorm riba esaki. Cada directiva mester manda un representante pa forma un plataforma y sigui traha ariba un proposicion pa gobierno, y e ta algo cu mester wordo canalisa sin worry ta cua gobierno ta na mando.
Simar tambe kier bin cu solucionnan a corto plasa, pero mester bin cu proposicionnan di cambionan den ley cu mester pasa. Durante e reunion tabata tin un abogado presente cu tabata djis skucha e proposicionnan y tabata duna su opinion solamente ora e tabata trata algo di ley. Tres schoolbestuur a mustra interes pa forma parti di e plataforma.
Simar lo sinta cu ministerio di Enseñansa pa wak kico ta e miho solucion, mirando e ultimo casonan cu tabata tin, atake contra maestronan dne diferente forma. Ta hopi importante tambe pa siguridad di maestronan. E plataforma kier bin cu algun proposicion cu nan por presenta na Minister di Enseñansa, sinta hunto y wak con ta soluciona esaki.
Riba e pregunta si tin bista caba di caunto placa ta papiando di dje, pa cuminsa garantisa e docente y e studiante un bon siguridad, Sra. Lazo- Tromp a splica cu nan no a yega na e punto ey ainda.
Despues lo mester sinta brainstorm pa sa kico ta pasando na cada scol y wak ki solucionnan por trece dilanti. Esaki ta plannan a corto plaso. Algun di e plannan ta trece gastonan cun’e y otronan no.
Bo ta haya un gedragscode cu ta papia tambe pa e cuido di e alumno, mayoria scol tin tambe cuido di e alumno. Pero aworaki ta papia tambe di siguridad di e maestro.
Den cada scol y cada situacion, ta haya muchanan cu ta lanta contra e maestro. Durante investigacion a sali afo cu e maestronan ta sinti pa e directiva para nan tras. Hopi biaha ora algo pasa cu’n alumno, sea e ta corecto of no, e maestro ta wordo poni den e spot. Naturalmente ta sali na vanguardia di e mucha, segun Sra. Sheila Lazo – Tromp.