Back to Basics part 1:
Workshop di pintura “Textile Hottie” pa e artista maestra procedente di Hulanda, Tanja Ritterbex.
Ateliers ’89 ta orguyoso cu e ganadora di e prome premio di pintura yama “Koninklijke Prijs” na Hulanda, esta e artista maestra, señora Tanja Ritterbex, ta bin Aruba pa duna les na Ateliers ’89.
Aunke Tanja Ritterbex ta un pintora, su trabou artistico semper ta varia ariba e tereno skerpi di e otro diciplinanan, manera escultura y performance. Door di esaki e sa di mantene su trabou artistico di pintura fresco y den movecion cu diferente acontecimento inespera. Esaki tambe nos ta bay experencia den e workshop aki “Textile Hottie” na unda prome cu tur cos lo puntra e participantenan si nan por traha un “wandtapijt” simpel,(tapijt pa colga na muraya). E imagen cu esaki lo produci y ta refleha lo bay wordo investiga y pinta den diferente manera durante e workshop. Di e manera aki e participantenan ta wordo poni den un “challenge” pa nan sali for di nan “comfort zone” di pintamento y descubri maneranan nobo di pintamento bou guia de e master den pintamento Tanja Ritterbex. Como cu Tanja lo guia personalmente cada participante ariba nan mes un nivel ta haci cu e workshop aki uno pa un y tur, pintornan avansa y aspirantenan.
Tanja Ritterbex a studia y gradua na e academia di arte di Maastricht Hulanda y a sigui despues di esaki na e renombra post academia di Dusseldorf Alemania y tambe na Ateliers na Amsterdam Hulanda. E la wordo puntra na varios ocasion pa bay den residencia na varios pais, por ehempel na Harare, Zimbabwe y Tel Aviv, Israel. Tanja a gana varios premio, entre otro na 2016 for di man di Rey Willem Alexander mes e Konijnlijke Prijs pa pintura autonomo. Su trabou artistico a wordo cumpra pa diferente museo y coleccionistanan di diferente institutonan y industria y ta wordo expone na diferente luga internacionalmente. E verano aki na Brazil y prome cu bin Aruba e ta biaha pa Moscu, Rusia pa un exposicion di su trabou di arte. E ta biba y traha na Berlin, Alemania.
E workshop aki ta e prome parti di dos workshop cu lo sigui otro, esta pintura y dibuho bou di e titulo back to basic, cual ta basa ariba e principionan di pintura. E workshop aki ta haci posibel door di e generoso donacion di Prins Bernhard Cultuurfonds Seccion Caribe y tambe UNOCA.
Ambos workshop ta un luna largo y ta pa un y tur cu kier siña pinta ariba un nivel profesional. Dianan di trabou ta di Dialuna pa Diahuebs for di 6.30 pa 9.30pm. Edad ta for di 12 aña pariba. Pa inscribi por mail [email protected] of por yama libremente na 5885776 o 5654613. Ateliers ’89 ta situa na man drechi ariba e crusada di Maria College na Playa. Inscribi awor ya cu cuponan ta limita.