MEDELLIN, Colombia- E menor a reconoce di a comete varios asesinato despues di a wordo recluta pa un structura criminal.
Ministerio Publico di Colombia a anuncia e detencion di un adolescente di 14 aña, acusa di a asesina dos homber siman pasa na Medellin, cu’n arma di candela. Segun e comunicado di parti di autoridadnan, un di tres persona cu tabata pasando eybanda, a resulta herida.
E menor ta wordo acusa di dobel asesinato, intento di asesinato y den posesion ilegal di arma di candela. E victimanan mortal tabata Alexis Hincapié y Mateo Cuesta Prieto, riba kende nan e menor a tira den un caya di e bario di Santa Lucia.
E alcalde di Medellin, Federico Gutiérrez, a afirma cu e adolescente a reconoce di a comete otro 10 asesinato mas, despues di a wordo recluta pa un banda criminal. “Loke a pasa cu e menor aki, a pasa cu mas di mil mucha den nos pais”, Gutiérrez a bisa den un entrevista na W Radio.
E crimen a wordo registra door di un camara di siguridad, cual video a wordo comparti ariba rednan social. Na momento di su detencion, polis a haya e adolescente cu’n revolver cu 6 cartuchi uza, y e menor a acepta e cargonan.
Sin embargo, autoridadnan a indica cu inicialmente, e acusado a presenta “un tarheta di identidad di un menor di 13 aña pa purba di wordo sentencia”, pero investigacionnan a establece cu en realidad ta 14 aña e tin y cu por lo tanto, e por wordo aresta según leynan vigente.