Tin hopi forma pa un cliente paga su number di auto cu ta un belasting pa ley, pero Servicio di Impuesto no kier haci esaki pero si por forsa via e ley cu por kita e placa di su salario si e cliente no bin paga su number di auto, segun Sra. Meverly Romano, vocero di SIAD.
Loke na Hulandes nan ta yama, e dwanginvordering, cual ta encera cu lo forsa e cliente pa haci pa e pago drenta, y esaki por bay via salario, via un deurwaarder na bo porta di cas, cu por bin entrega un dwangschrift. E por bay hopi mas leu, caminda cu, si e cliente tin placa di belasting pa haya bek, por desconta e debe di Motorrijtuigbelasting for di nan restitucion. E por hasta bay poco mas leu, caminda cu deurwaarder por yega pone beslag ariba pertenencia di un persona.
Sra. Romano a sigui splica cu esakiann ta procesonan cu ta sosode tur dia, mescos cu ta sosode cu cualkier tipo di belasting. E proceso aki nunca e tabata asina cu e tabata valido pa Motorrijtuigbelasting, pero pa Winstbelasting of Inkomstenbelsasting, pero pa e aña aki, e proceso di cobramento aki awo tambe ta conta pa Motorrijtuigbelasting y ta pesey ta recomendabel pa haci e pagonan manera e periodonan ta bay.
Clientenan cu a ricibi e carta di recordatorio, ta clientenan nan no a paga nada di 2017, posiblemente tambe, nan lo tin 2015 y 2016 habri. Si esey ta e caso,e cliente di lista den e carta cu el a ricibi ta mas largo. Si ta un cliente cu falta 2017 so pa paga, e lista ta menos. E ta bay tambe pa tur e numbernan cu bo tin ariba bo nomber registra cu no tin pago ariba dje. Ta haya un cliente cu tin tres auto, tur tres number e no a haci pago ariba nan y tur esey ta parece den su carta cu el a ricibi.
Ultimo dianan aki ta super druk na Departamento di Impuesto, cu clientenan cu ta bin paga nan numbernan. Tambe tin hopi cliente ta reclama cu nan a entrega na number di auto pero asina mes nan ta haya un carta. Sra Romano a splica cu no ta paso a entrega e plachi di number, esey no kiermen cu e debe ta keda kita for di e sistema. Ora cu e cliente entrega su plachi di number, Departamento di IMpuesteo mester warda pa wak cuanto tempo e plachi di number ta bay keda eynan. Despues lo determina si e cliente a laga su plachinan pa un kwartaal of mas, e ora e ta bin na remarca pa haya dispensacion pa e periodo cu e plachi a keda aden. Pero si e cliente a entrega su plachi y despues di un siman of un luna el a bin buske, e cliente aki no ta haya dispensacion pa e belasting. Ora cu e bin busca su plachi e ora ta wak cuanto tempo el a keda aden. E dispensacion ta mara na e periodo completo cu e plachi a keda aden y ki dia e plachi a wordo entrega.
Sra. Romano a duna un ehempel, bisando cu si e cliente a entrega su plachi na Februari, mientras cu e kwartaal a cuminsa na Januari y a bin buske bek na Maart, e plachi no a keda aden pa un periodo completo. Esey ta un motibo pa cual nan tin basta cliente cu ta acudi na Departamento di Impuesto, unda nan ta bisa cu nan a haya un carta bisando cu e tin debe, mientras cu el a entrega e plachi. Number di auto ta hopi individual y cada caso mester wordo revisa un pa un.
Algo cu ta bin hopi dilanti, ta cu hopi hende ta bende nan auto y nan no ta percura pa cambia e registro cu nan tin ariba e number. Si nan ta bende e auto y nan ta cumpra un otro, e cliente mester percura pa e auto nobo ta debidamente registra ariba su nomber riba e number corecto. Den practica esaki no ta sosode, e cliente no ta bin Departamento di Impuesto pa haci cambio. Tambe tin cliente cu ta bende nan auto y cu e number sin haci e cambionan. Esey por tin consecuencio hopi fastioso pa e cliente aki. E plachi di number ta registra ariba un nomber. Si bo bende bo auto y bo ta laga e plachi bay cu e auto, mester corda cu e doño nobo lo no worry pa paga ya cu e no ta ariba nan nomber.
Hopi ta e clientenan cu ta reclama cu nan a bende e auto mas di un aña caba y nan no ta compronde dicon e debe ta habri ainda. Pero si e cliente no bin regel esaki e debe ta keda habri y e doño “bieuw” ta esun cu lo keda responsabel pe y na final, ta e cliente aki lo mester paga e debe aki tambe, segun Sra. Meverly Romano, vocero di Departamento di Impuesto.