Ofo Escudero, vocero di Aruba Entertainment 2020 ta splica Masnoticia cu declaracionnan di Korpschef ultimo tabata mustra manera algo cu nos a bolbe dal un par di stap patras despues di tur negociacion cu tabata tin cu crisis team. “Pero tog ta comprendibel cu despues di un fin di siman di halloween cu por ta cosnan a bay un tiki for di man, ta compronde cu tin biaha nan mester tuma accion, pero tog nos ta pensa cu nos negociacionan cu crisis team e idea semper tabata for di un principio pa yega na protocol cu tog por wordo organisa pero structura”, sr. Escudero ta bisa.
Esaki ta locual nan ta bezig cu ne pa un par di siman caba den reunionnan cu crisis team, caminda e idea ta cu e musiconan por traha pero den un manera structura.
Ofo ta splica nos cu nan semper ta hiba e pensamento cu si no tin mucho cos di haci, esey ta habri caminda pa hende cuminsa organisa nan mesun cosnan, anto hopi biaha ta cosnan cu ta ilicito. Nan ta inventa kico cu ta pasobra e hamber pa bay sali t’ey despus di tanto luna caba bibando den e pandemia, cosnan ta cuminsa cambia y hende ta cuminsa fada un tiki di ta na cas tambe. “E parti ey ta trece cierto problemanan social tambe cu bo ta cera den cas sin por haci esaki of esey”, sr. Escudero ta expresa.
E musiconan ta keda para riba cu si nan por ta eherciendo nan trabao, nan por haci uzo di nan plataforma pa esunnan cu ta bin por cumpli cu e reglanan. Pero ora hendenan organisa nan festividadnan ‘underground’ of clandestino, no ta bay tin nada eyden di protocol pa wordo controla. “Nos si por yuda e causa cu locual crisis team y dvg ta brindando”, sr. Escudero ta bisa.
“Si nos ta na cas, e ora e ta dificil pa nos tambe yuda, pasobra nos no tin e microphone den nos man e momento eynan pa conscientisa e pueblo, para e muziek si cos ta bayendo for di man y bisa tur hende cumpli, ambiente ta sigui trankilo y bo tin tur hende controla”, e ta sigui splica.
“Protocol Officer” pa yuda controla durante evento
Un sugerencia cu Aruba Entertainment 2020 a trece dilanti ta por ehempel na compania cu kier tin un evento structura cu protocol, por introduci un Protocol Officer cu ta bay riba gasto di esun cu ta organis’e, para na porta y controla. E Protocol Officer lo tin na su encargo tur cos y tur informacion, enbes di bay na e parti di mas drastico, por topa e Protocol Officer na porta y dialoga cu ne riba kico no por anto drecha esakinan mesora. “Tin maneranan cu nos por yega na otro sin tuma decisionnan drastico cu na final di dia lo ta malo pa economia, malo pa Aruba y tur esunnan cu ta bay keda cas sin trabao”, segun sr. Escudero.
E musico ta conclui bisando cu tin henter un plan traha manera anteriormente menciona caba, cu companianan por tog haci uzo di e temporada di December caminda tin asina tanto evento corporativo, pero cu su reglanan den dje. Y ta cosnan cu por bay segun sr. Escudero, y nan ta hopi optimista cu e siguiente reunionnan cu crisis team lo por trece bon resultado. “Pero atrobe nos tin cu traha hunto pa nos mantene e casonan positivo di covid19 abao.”