CARACAS, Venezuela – E presidente Venezolano, Nicolas Maduro, a sigura den un di su alocucionnan presidencial cu si e yega na participa den un eleccion na Colombia, e lo gana e presidencia cu mas di 70% di e votonan.
“Pueblo Colombiano stima, cu stimami. Boso ta corda cu boso tabata bisa cu mi tabata Colombiano? Mi ta kere cu si mi bay pa e Presidencia di Colombia, mi ta gana cu setenta of ochenta porciento (di e votonan),” Maduro a bisa durante un transmision televisa yama “El cierre del año de las Misiones Sociales.”
Durante su balance, e mandatario Venezolano a recorda cu, segun e, e Cucuteñonan ta stim’e, y a haci alusion na e declaracion entrega den dianan pasa, ora cu el a bisa cu si e lansa su mes pa e alcaldia di e capital di Norte di Santander, e lo gana cu 100 porciento di e votonan.
“E pueblo di Cucuta stimami, mi lansa mi mes pa alcalde na Cucuta y gana cu 100% di e votonan, mi ta lansa mi mes pa gobernador di Norte di Santander y gana cu 100% di e votonan, claro mi no por haci’e, pasobra mi a nace na Caracas y mi ta Venezolanito,” Maduro a bisa dia 27 di December ultimo.
Fuente: El Colombiano