PYONGYANG, Noord Korea – Noord Korea lo actua di manera “implacabel” den e minimo provocacion di Merca, e embahador Noord Koreano na Rusia a declara diahuebs, mientras cu Washington a anuncia di bay reforsa nan capacidadnan militar tras e lansamento di un misil di parti di Pyongyang.
“Nos ehercito ya a declar’e: sin tin e mas minimo provacion di Merca durante ehercicionan militar, nos ta dispuesto pa dal un golpi implacabel,”Kim Hyong jun a afirma durante un reunion di mesa rondo na Moscu.
Sur Korea y merca mester realisa riba dianan 13, 21 y 26 di April, ehercisionan militar conhunto, cerca di e frontera entre e dos Koreanan, segun e ministerio di Defensa Sur Koreano, cita pa e agencia di prensa Yonhap.
Pyongyang ta considera cu e ehercisionan dirigi pa Washington y Seoul ta consisti di “entrena pa un operacion cu finnan di distrui nan capital y tuma e poder” na Noord Korea, segun su embahador.
“Awo nos ta posee armanan nuclear y otro armanan moderno. Como ya nos a bisa den varios ocasion, nos ta prepara y nos ta capas di combati cualkier desafio di parti di Merca,” el a menasa.
E presidente Mericano, Donald Trump, a sigura diaranson na e prome minister Hapones, Shinzo Abe, cu Merca lo bay “reforsa” su capacidadnan militar pa responde e menasa Noord Koreano, segun un comunicado di Cas Blanco.
Diaranson, na bispo di un cumbre entre Trump y e presidente Chines Xi Jinping, Pyongyang a manda un misil nobo.
Ta trata di un “accion peligroso provocador,” Abe a declara na prensa despues cu su conversacion cu e presidente Mericano
Fuente: NTN24