Recientemente a ripara cu tin un ola di bruela ta pasando riba Aruba y consecuencia di esey ta cu ta hayando peticion pa BVVD, esey ta peticion pa bo keda sin traha, pero cu mantencion di e salario. E procedura di BVVD ta uno basta complica, pasobra cierto momento e ta bay DRH, djey tin cu bay pa minister, despues pa ministerraad, despues e peticion ta wordo hinca den un landsbesluit, despues bay gobernador, despues e tin cu firm’e. E ta un proyecto hopi largo. A base di esey a bisa cu ora cu tin bruela, den e caso aki, bo ta gewoon malo y tin cu meld AO segun e procedura di AO, e ora esey ta wordo administra y no tin problema y ta bin bek ora cu ta totalmente cura for di e bruela.
Situacionnan na cas manera un mayor cu tin e cuido di su yiunan menor y cu nan por ehempel a haya bruela y nan mester keda cas, pa via cu nan no por bay scol, cual ta di compronde, e ora un mayor asina, si e no tin un otro forma pa asumi e cuido di su yiunan, e por pidi un asina yama Zorgverlof na su hefe di trabao y esey tambe ta bay facil. E hefe di trabao, e director ta acorda y despues ta informa DRH di e peticion aki.
Mas bien ta pa simplifica e procedura ora cu un persona, manera un trahado di Gobierno haya bruela e mester haci e peticion of e informacion di AO y ora cu e ta full cura, e por asumi su trabao bek.
Ta asina cu den LMA, den articulo 51 ta para un cierto cantidad di malesa contagioso cu por crea un epidemia, por ehempel roodvonk, lepra, pokken, etc. y keintra geel y pa eseynan si, nan ta den bo seno na cas por ehempel, bo por pidi BVVD pa asina ey por domina e peliger, e riesgo di un epidemia. Bruela no ta wordo menciona den e ley aki, cu ta LMA articulo 51. Pesey a manda un recordatorio pa si acaso bo tin bruela, bo tin cu gewoon meld AO. Malo ta malo. E ora ey ta haya bo AO te ora cu bo ta recupera completo.
Segun minister Bermudez, mayoria di nos leynan toch, manera cu a wordo bisa, manera leynan di impuesto, ta hopi anticua. E LMA aki ta existi 30 aña caba. E mester wordo renoba y esey no a sosode. Esey no ta kita cu e ta ley y ley ta conta. Tin cu aplica ley pasobra sino ta haya den un sistema caotico. No ta kita naturalmente cu ora ta aplica ley, toch ta tene cuenta cu loke ta pasando awendia den nos comunidad. Pesey tambe, henter e idea di e carta ta, no haci e procedura complica door di pidi BVVD ora bo tin bruela, pero gewoon meld ziek y haya bo AO.