HALIFAX, Canada – Shete mucha di un famia di refugiado Sirio a muri ora cu nan cas unda nan tabata biba a coy candela. Esaki a sosode den e ciudad Canades Halifax, den e costa Atlantico di e pais.
Ademas di e shete menornan, dos adulto (un homber y un muhe) a resulta herida pa cual nan a wordo transporta pa hospital den oranan di marduga.
Den un conferencia di prensa teni diaranson, hefe interino di Cuerpo di Bombero di Halifax, David Meldrum, a declara cu pa 12 or y 41 di anochi, servicionan di emergencia a ricibi “varios yamada” cu a alerta di un candela den un di e bisindarionan di e ciudad.
E hefe a bisa tambe cu na a cuminsa varios investigacion pa determina e causanan di e candela y cu cualkier “speculacion” riba e origen di e candela no ta na su luga, EFE a reseña.
Prome Minister Canades, Justin Trudeau, a expresa su condolencia pa cu e tragedia aki via su cuenta di Twitter.
“No tin palabra pa expresa e dolor ora cu muchanan cu ta perde nan bida asina lihe, specialmente den circunstancianan manera esaki. Mi curason ta cu e sobrevivientenan di e candela horroroso di Halifax awe mainta y nan sernan keri ta yorando e perdida grandi aki”, Trudeau a bisa.
E centro comunitario y mezquita Ummah di Halifax a señala riba Facebook cu e shete menornan tabata yiunan di e pareha cu a resulta den e candela.