Salud: Ta hopi importante pa mantene bo cerebro activo, esey ta un di e manera nan mas importante pa preveni aparicion di malesanan neurologico, stimula e cerebro cu actividadnan cu ta yuda na aumenta e conexion entre e neuronanan.
Pa logra tur e beneficionan aki ta hopi importante pa haci ehercicio di cerebro cu e meta cu e ta keda funciona miho posibel. Actividadnan cognitivo ta por ehempel: lesa un buki, socialisa cu otro hendenan, participa weganan cognitivo, manera domino, hersengymnastiek, mens erger je niet etc.
No por lubida di agrega na nos bida habitonan saludabel. Mester haci movecion, no huma, evita stress, consumo di alcohol, mantene un salud mental balansa.
Nos tin algun tips pa abo por tin control pa mantene un cerebro saludabel: Haci actividad cognitivo cu ta stimula e cerebro pa pensa. Actividad por ta skirbi lesa, memorisa number di telefon, wega di mesa, obra di man, siña un idioma.
Haci algun actividad fisico regularmente dor di haci un deporte of simplemente cana minimo 30 minuut pa dia. Crea relacionnan social cu otro personanan pa evita isolacion social y stress. Combersa cu bo bisiña, amistadnan y incorpora den gruponan social. Mantene un dieet saludabel y balansa. Evita demasiado vet di animal, salo, y come hopi mas fruta cu berdura.
Ta recomendabel pa evita consumo di alcohol, tabaco, y droga y si ta posibel drumi.8 ora pa dia. Controla stress y hipertension, esaki ta e factor principal di riesgo pa malesanan cerebro vascular. Proteha e cerebro contra golpinan pisa dor di usa faha di seguridad den auto of tambe helm ora di core ariba un brommer, scooter, bicicleta, rollerblades of skateboards.
