Mas di shen auto a dal den otro riba un caretera di e ciudad Chines di Suzhou diabierna, lagando varios persona herida, e medionan local a informa.
E accidente a tuma luga debi n’e condicionnan meteorologico extremo, en particular pasobra e camindanan tabata gevries. Despues di e accidente, tres persona a wordo hospitalisa cu herida y seis mas a ricibi rasca leve.
E video, publica riba e rednan social, ta mustra e autonan destrosa cu ta blokia e caminda completamente, cu bentana y desperdicio tur caminda. Por mira cu varios auto a wordo lanta p’e otronan cu a dal den nan.
Actualmente polis ta investiga loke a sosode, purbando di identifica e responsabelnan di e accidente y su circunstancianan. E caminda ya a wordo despeha y e trafico riba e caminda a reanuda.
E Observatorio Meteorologico di Suzhou a emiti diahuebs un advertencia pa caminda gevries, afirmando cu “debi n’e awasero y e temperaturanan abao, ta spera formacion di ijs riba algun caminda di Suzhou, specialmente viaducto, brug y otro zona.” Di su parti e Oficina Municipal di Emergencia y e Oficina Municipal di Meteorologia a pidi e chauffeurnan pa tuma medida di precaucion y stuur cu cuidao.
