DEN HAAG – Awe ta cuminsa na Den Haag e caso penal cu cuater viuda Nigeriano a cumisna contra di Shell. Nan ta acusa Shell di ta co- responsabel pa e ehecucion di nan cas durante e regimen militar na Nigeria na 1995.
Es tempo ey Shell lo ta pidi gobierno di Nigeria pa actua contra di activistanan den sur di Nigeria cu tabata protesta contra di e extraccion di petroleo contamina na Ogiland. Ora cu tabata bisto cu e ehercito tabata viola e derechonan humano, Shell no a haci nada pa evita esaki, segun Amnesty International cu ta asesora e viudanan.
Eventualmente e nuebe activistanan aki, e asina yama ‘Ogoni nine’ a wordo condena na morto door di un crote militar. Un di nan tabata e conocido escritor Nigeriano Ken Saro-Wiwa. Shell semper a nenga e acusacionnan aki.
VIOLENCIA
E poblacion Ogoni na comienso di e decada di 1990 a protesta contra e extraccion di petroleo den nan zona di e Delta Nigeriano, sur di Nigeria. Bou liderazgo di Ken Saro- Wiwa nan a exigi Shell pa aborda e tema di e contaminacion den nan zona. Tambe nan tabata kier un parti mas grandi di e ganashi cu e extraccionnan aki tabata duna.
Ehercito Nigeriano a actua cu man duro contra di e protestanan. Segun organisacionnan di derecho humano, mas di shen persona a perde nan bida. Na januari 1993, Shell a dicidi di stop cu extraccion di petroleo den Ogiland, ya cu e tabata birando demasiado peligroso pa su personal. Pero si e compania tabata tin e tuberianan ta core dwars door di Ogiland.
EXCUUS
Awe pa prome biaha Esther Kiobel lo testigua den corte ariba e morto di su casa Barinem Kiobel. E ta bringando pa restauracion di su honor. Anteriormente el a entama un caso den Corte Mericano, pero esaki a faya door cu corte Mericano no tabata considera nan competente.
Abogado di e cuater muhenan aki ta kere cu den un corte Hulandes nan tin miho posibilidad, mirando cu e compania petrolero Britanico- Hulandes, su oficina principal ta na Hulanda. E muhenan ta exigi un excuus y daño y perhuicio.
‘NO CULPABEL’
Dies aña pasa e famia di Ken Saro- Wiwa a haya un compensacion di 15,5 miyon dollar for di Shell, pero e compania a expresa cu nan no tin culpa. Tabata trata di un ‘gesto humanitario”, segun Shell, pa compensa e famianan pa nan perdida y gastonan huridico.
Segun un vocero na Nigeria, Shell na niun momento a coopera cu autoridadnan pa asina suprimi e protesta y e compania petrolero tampoco a apoya e violencia of a hunga un rol den e aresto of condena di e nuebe hombernan di Ogoni.
Shell na varios ocasion a haci apelacion na e presidente Nigeriano pa otorga e hombernan aki clemencia. “Ta duel nos cu autoridadnan no a duna oido na esaki”.
Nigeria ta un di e proveedornan mas lucrativo pa Shell, pero tambe un dolor di cabes. Na 2015, Shell a paga 70 miyon euro di daño y perhuicio na e habitantenan di un pueblo di piscadonan como compensacion pa contaminacion di nan habitat. Na Italia tin un caso penal contra di Shell pa corupcion.