E demanda mundial di “liquid natural gas” of miho bisa LNG, lo crece mas di un 50% pa 2040, te yega 625-685 miyon ton, e petrolero Britanico Shell, a proyecta diaranson.
Segun e informe, ya den 2023, comercio mundial di LNG, a alcansa 404 miyon ton, compara cu e 397 miyon ton di 2022. Shell a splica cu e aumento ta debi cu e transicion di carbon pa gas den e industria ta acelerando na China y den zuid di Asia y cu e paisnan di e zuidoost Asiatico ta uzando mas LNG pa sostene nan crecemento economico.
“Ta probabel cu China domina e crecemento di e demanda di LNG e decada aki, ya cu su industria ta purba di reduci e emisionnan di carbon mediante e cambio di carbon pa gas,” Steve Hill, vice-presidente ehecutivo di Shell Energy, a afirma.
E rapport ta mustra cu e demanda di LNG ya a yega su top den algun region, pero ta sigui aumenta rond mundo.
Tambe, ta señala cu e gas ta complementa e energia di biento y solar den pais cu nivel halto renobabel den su generacion electrico, proporcionando flexibilidad a corto plaso y siguridad di suministro a largo plaso.
