Dialuna tabata di na Aruba, pa un bishita cortico, Sra. Sharon Dijksma, Secretario di Estado di Hulanda, kende a splica tocante e ultimo desaroyonan den e mundo di aviacion, specificamente di Insel Air, caminda cu a tuma e decision pa interveni den e operacionnan di Insel Air.
E la reuni cu tanto Gobernador di Aruba, Su Excelencia Sr. Alfonso Boekhoudt, como tambe Prome Minister mr. Mike Eman, y Minister di Transporte, ing. Mike de Meza, tocante e situacion di trafico aereo den Caribe Hulandes. No solamente na Aruba pero tambe na Corsou. Recientemente ambtenaarnan Hulandes a tuma decision pa no biaha mas cu Insel Air Curacao y e consecuencianan cu esaki ta trece cun’e ta cu, segun Sra. Dijksma, contando cu e aprobacion di Gobierno di Aruba y Corsou, lo interveni den e operacion di tanto Insel Air International como Insel Air Aruba. Esaki ta suma na e decision tuma caba door di Gobierno Mericano.
Esey ta encera entre otro cu un ekipo di inspector Hulandes e siman aki ainda lo biaha pa Aruba y Corsou pa conduci e inspeccionnan necesario riba e companianan aki. E investigacion lo ta basa riba e manera con e inspeccionann ta tuma luga, tanto na Aruba como na Corsou. Den un informe cu Sra. Dijksma a ricibi for di e reciente bishitanan na Aruba y Corsou, ta para cu tin deficiencianan den e autoridadnan di supervision, ariba ambos isla. E situacion na Corsou ta hopi mas serio cu na Aruba, segun Sra. Dijksma. Pa siguridad aereo, e avionnan cu actualmente ta ‘geground’, lo keda geground. Asina secretario di estado Hulandes Sharon Dijksma a bisa.
Sra. Dijksma a sigui bisa cu cerca e supervision na Aruba tambe a nota deficiencia, y no mester pensa solamente riba problemanan administrativo, pero tambe deficiencia unda cu no solamente papia di inspeccion di e avionnan riba plataforma, pasobra ey tin cosnan bon ta pasa. Sra. Dijksma ta papia mas bien riba e sistema di control y e forma con e control ta tuma luga, si esaki ta suficiente actualisa y modernisa.
Mirando cu no por tin duda riba e supervision riba siguridad di aviacion, a dicidi cu ambos gobierno, tanto di Aruba y di Corsou pa bin cu un tipo di acuerdo cu ta encera cu tanto Aruba como Corsou ta haya asistencia inmediato di inspectornan Hulandes, caminda nan lo haya e mandato pa mantene supervision manera cu ta custumber na Hulanda. E inspectornan Hulandes lo keda staciona na Aruba, mas pronto posibel. Segun Sra. Dijksma, esaki ta necesario pa motibo cu actualmente no tin vuelonan tumando luga na Aruba, pa motibo di un re- certificacion di Insel Air Aruba.
Secretario di Estado Hulandes, Sra. Dijksma a sigui bisa cu e inspectornan Hulandes y Arubano lo haya e oportunidad pa termina e re- certificacion, cu lo mester conduci na un situacion positivo. Tambe el a splica bon cla, cu Hulanda lo no pone placa ariba mesa pa mantene un aerolinea priva. Den otro palabra, Hulanda lo no pone placa disponibel pa mantene Insel Air na bida.