Dia 7 September proximo lo biaha pa Oslo, Noruega e atleta Shamira Clara, kende lo participa den e 21k Half Marathon na e capital di dicho pais. Despues di competi den e Ronde van Aruba hunto cu algun coredo internacional, Shami Clara a haya invitacion di Marit Rustad di Noruega pa Shami core na e pais Scandinavo. Tur aῆa den luna di September tin e Full & Half Marathon na Oslo, Noruega esun di e aῆa aki riba e fecha 17 September 2016. Mas cu claro Shami a acepta e invitacion como cu nunca el a bay Noruega y claro cu esaki tabata e reto nobo pa asina e sigui cu su motivacion pa entrena mas duro y prepara su mes debidamente pa e careda di 21k.
Mester bisa cu Shami a opta pa core e Half Marathon mirando e aña aki na Januari el a core e Full Marathon (42.5k) na Miami y e experiencia tabata unico, algo sigur cu e no lo lubida. Pero esaki a trece consecuencia unda Shami a keda lesiona na su rudia y mester a recupera casi un luna pa regresa bek, su speed a baha drasticamente y a tuma basta tempo pa stabilisa na e forma cu e tabata kier. E Half Marathon di Oslo ta pas den Shami su schedule di coremento combina cu su bida personal, tambe Shami ta entrena na Muscle & Lungs Crossfit den oranan di atardi. Manera Shami mes ta bisa entrenando den e forma aki e ta keda cu su mesun speed di coremento nan riba e distancianan mas cortico na Aruba esta e 10K, 8K of 5K.
Despues cu e atleta Clara a tuma e decision di bay core afo, e la aserca su ekipo di coremento 297 Runners y nan a apoya su persona all the way. Hunto cu coach Danilo Rudolfo y henter e ekipo di 297 Runners nan a sigui cu un entrenamento pa e Half Marathon 14 siman di un programa y eynan tur cos a inicia. Hunto cu e ekipo di 297 runners Shami ta core 5 biaha pa siman, mayoria biaha ta mainta tempran esaki pa motibo di trabou.
Di curason, Shami kier a gradici cada un coredo di 297 Runners, no solamente pa e compania riba e journey, pero tambe pa e stimulacion, apoyo y lage enjoy cada entrenamento.
E no por lubida di gradici henter e ekipo di Muscles & Lungs Crossfit cu a haci Shami mentalmente hopi fuerte den coremento y a dune su forsa y resistencia. Por ultimo Shami ta manda un danki na Crossift coach William Erasmus pa e “running mechanics tips”.
Tur clase di exito pa Shamira Clara den e 21k Half Marathon na Oslo, Noruega