Shakira y Carlos Vives den corte acusa di plagio

MADRID, Spaña- Na Madrid a tuma luga e caso di demanda presenta pa e cantante Cubano Liván Castellano Valdés, cu a ta acusa Shakira, Carlos Vives y e compositor Andrés Eduardo Castro di plagio.
Castellano ta reclama e derechonan di autor di “La bicicleta”, ganado di Grammy latino na miho cancion na 2016 y cu a bende mas di 210 mil copia, bisando cu esaki ta un plagio di su tema “Yo te quiero tanto” de 1997.
Shakira a splica cu el a haya un demo via e compania disquera Sony, di e cantica di Carlos Vives, cu kende e tabata kier a traha y cu na prome instante e cantica tabata yama “Vallenato desesperado” y ta recorda: “Mi a gust’e asina tanto y mi a sinti cu mi por a agrega algo na dje”.
Su aporte, según Shakira, tabata di incorpora e melodia di e acordeon, parti di e coro, na cual ta haci referencia di “lleva, llévame en tu bicicleta”, y p’esey nan a dicidi di cambia e nomber di e cantica.
“E hendenan a disfruta hopi den zomer di 2016, ya cu e ta hopi alegre, e ta papia di e custumbernan y e spirito di mi pais, di Santa Marta, di Barranquilla y di Piqué -e futbolista pareha di e cantante”, Shakira a bisa referiendo na e mencion di Barcelona den e cantica.
“Esaki ta e homenahe na mi tera y no tin nada di haber cu e demandante”, el a agrega.
Shakira a termina su declaracion bisando: “Den trinta aña di carera nunca mi a yega di presenta den corte pa un tema asina desagradabel manera esaki”.
Carlos Vives, cu tambe a nenga e plagio, a proclama su mes como “e tata di musica moderno Colombiano” y el a recorda cu na Spaña el a wordo bautisa como “E rey di vallenato”.
Di su banda, Livan Castellano ta mantene cu e dosnan aki a comete plagio cu su cantica.

Comments

comments