MADRID (AP) — Shakira ta na punto di wordo acusa pa un presunto fraude fiscal a pesar di cu e strea Colombiano ya caba a paga mas di 39 miyon dollar ariba su debe cu e tin cu Belastingdienst Spaño.
Den un documento di dia 29 di november, cu ta e conclusion di un aña di investigacion y na cual AP tabata tin acceso na dje, Belastingdienst a manda informa e defensa di su decision di presenta un demanda contra di Shakira pa considera cu ta existi hechonan cu ta apoya e decision di persecucion di e presunto delitonan.
Shakira, cu recientemente a conclui su gira mundial El Doarado, ta bisa cu su actividadnan profesional pafo di e pais entre 2012 y 2014 no mester ta paga belasting ariba dje.
Belastingdienst di Barcelona a señala den un comunicado diabierna cu e ta den e fase final di estudio di e presunto iregularidadnan pa actividadnan fiscal prome cu 2015, e aña cu e cantante a traslada su residencia fiscal di Bahamas pa e capital Catalan.
E artista di 41 aña, cual nomber completo ta Shakira Isabel Mebarak Ripoll, ta biba hunto cu e hungado di Barça Gerard Piqué, cu kende el a cuminsa un relacion na 2011 y e tin dos yiu.
Na Februari Shakira paga 20 miyon euro na belastingdienst Spaña pa cobransa di belasting di 2011, segun un vocero di su defesa cu a bisa cu e demanda na cual e artista ta wordo enfrenta ta exclui 2011.
Pero si e artista lo mester responde na husticia pa 14,5 miyon euro supuestamente evadi durante e tres añanan siguiente.
Na 2017, e strea a aparece den un serie di documentonan riba paraisonan fiscal conoci como “Paradise Papers” hunti cu e musiconan manera Bono di U2 y Madonna. Segun archivonan, Shakira na 2009 a traslada tur su derechonan di propiedad intelectual, bienes musical y marcanan pa un compania cu sede na Malta, cu ta forma parti di Union Europeo cu amplio bentahanan fiscal.
Relaciona cu su antiguo domicilio fiscal, Shakira a bisa cu entre 2004 y 2014 e tabata biba oficialmente na Bahamas, unda el a cumpra un cas cu su ex pareha, e abogado Argentino Antonio de la Rua.