Diamars 28 di februari 2023, Presidente di Parlamento di Curaçao sra. Charetti America-Francisca, a haci apertura oficial di IPKO na Dreams Resort, Spa & Casino aki na Curaçao. Despues di e apertura oficial, e lidernan di cada delegacion, esta di Curaçao, Aruba, Sint Maarten y Hulanda a tene nan desertacion.
Den caso di Aruba nos Presidente di Parlamento sr. Edgard Vrolijk a hiba palabra como hefe di delegacion. Mi persona, como presidente di comision di Asuntonan di Reino di Aruba, tambe a hiba palabra y a duna un relato tocante e ultimo desaroyonan di nos pais. Despues di e presentacionnan di cada pais nos a haya presentacion di empleadonan publico di Ministerio di Husticia riba e topico di migrantenan y e retonan cu personanan indocumenta y djei a sigui trata e punto aki den sala. Un dia largo y intensivo, cu a culmina cu un actividad cultural di kita sombre caminda a crea un anochi di historia, baile y teatro combina cu un presentacion culinario complementando esakinan y contando su propio historia. Tremendo mes.
E siguiente dia IPKO a continua caminda a habri cu presentacion di señor dr. Ruthsel Martha y señora dr. Aubrich Bakhuis. Ambos a trata e topico di deficit democratico. Un topico cu pa añas ta punto di atencion y di discucion. Ambos tabata di bon contenido y sigur a pone un bista critico riba e topico.
Highlight di e dia sigur ta e entrega di un concepto di un Areglo di Disputa “geschillenregeling” door di Aruba, Curaçao y Sint Maarten.
Despues di break a sigui cu debatenan den grupo. Den cuadro di e pakete di reforma nos a para keto na entre otro e temanan di enseñansa, medio ambiente y clima, proteccion di data, stimulacion di empleo y combatimemto di pobresa.
Un otro dia intensivo yena di topico interesante y importante pa nos pais.
