Diasabra ultimo, 4 di november, Fundacion Hende Homber Aruba a celebra nan di 10 aña di existencia cu un tremendo conferencia.
Na prome lugar mi ta gradici Fundacion Hende Homber Aruba pa e invitacion pa mi participa nan dicho conferencia y tambe kier a felicitanan cu nan 10 aña di existencia y pa tur nan trabounan realisa pa empodera e hende homber.
E conferencia no tabata dirigi solamente na e hende homber pero sigur como hende muhe mi a keda encanta cu e diferente topico y angulo cu esakinan a keda adresa. E conferencia su titulo tabata: “Hombernan cu ta marca e diferencia”, na unda e enfoke tabata riba e “bienestar emocional y mental”. Tabatin diferente orador local y e topiconan tabata varia. Mi por bisa cu e tabata un tremendo conferencia. Mi lo aconseha tur ser masculino pa otro aña no perde e oportunidad di participa. E lo enrikece bo grandemente y sigur lo haci un impacto riba bo actitud y actuacion. Banda di e hecho cu e por aporta grandemente na bo crecemento y desaroyo propio.
Sigur mi ta aplaudi e meta di e fundacion pa empodera nos hende hombernan pa nan mes por ta of bira un miho persona y ta feliz. Na mes momento e plataforma ta brindanan e toolsnan pa nan ta entre otro un miho yiu, casa/pareha y tata.
Ami a keda encanta! Un pabien sigur ta na su lugar na full e comite organisado y tur otro stakeholder cu a haci e conferencia di Fundacion Hende Homber Aruba posibel. Mi kier a termina deseando Fundacion Hende Homber Aruba hopi exito cu tur nan proyectonan den tapara.
