Diamars, 24 di october 2023 a tuma lugar un reunion Tripartiet entre delegacionnan di Parlamento di Aruba, Curaçao y Sint Maarten na nos hermana isla Sint Maarten.
Pa Aruba ta participando tur miembro di e Commisie Koninkrijksaangelegenheden en Buitenlandse Betrekking.
E obhetivo di e Tripartiet aki ta pa Parlamentarionan di e tres paisnan tin e oportunidad pa trata temanan di interes mutuo. Durante e Tripartiet na februari 2023 na Curaçao, e delegacionnan a acorda pa aumenta e frecuencia di e cantidad di consultanan Tripartiet y cu lo incorpora un reunion cu no ta mara na un reunion di IPKO.
Experiencia y practica a siña nos cu trahando hunto, den union, nos por logra hopi pa nos hendenan. Alabes a keda demostra e poder di e union aki ora hunto nos a para contra Hulanda pa loke ta trata e drama cu COHO.
Entre e temanan cu nos lo ta tratando awe ta: trafico aereo entre e islanan (frecuencia y prijs), e uso di rijkswetten (consensus), geschillenregeling y con como Parlamento nos por atende cu e necesidad pa brinda alivio na pobresa.
Accento sigur di e reunion Tripartiet lo ta pa sigui traha riba e union entre e islanan y sigui enforsa esaki. Sigur esaki lo beneficia e bienestar di nos hendenan.