Diaranson ultimo den presencia di representante di Ministerio di Turismo, e ekipo di Aruba Tourism Authority (A.T.A.), representante nan di Aruba Ports Authority (A.P.A), S.E.L. Maduro & Sons y Imigracion di Aruba a ricibi bishita di e luhoso Seven Seas Explorer di e liña di crucero Regent Seven Seas Cruises pa prome biaha. E crucero luhoso aki a drenta den servicio den luna di Juli di e aña aki y a sali for di Miami pa e region Caribe pa prome biaha unda Aruba tabata tin e honor pa ta e prome destinacion di bishita. Despues di a bishita Aruba, Seven Seas Explorer a sigui pa hermana isla Bonaire como su di dos stop den Caribe.
Durante e ceremonia inaugural, e capitan di e crucero, señor Stanislas Mercier de Lacombe, a intercambia plakkaat cu e representantenan di e delegacion di Aruba. Asina aki señor Patrick Melchiors a hiba palabra den nomber di A.T.A., gradiciendo e capitan y alabes yama e tripulante bon bini riba nos isla. E Manager General di Seven Seas Explorer, cu ta señor Franck Galzy, tambe tabata presente durante e ceremonia y a gracidi un y tur pa nan presencia.
Graceo Dunlock, Manager Shipping di S.E.L. Maduro & Sons tambe a hiba palabra yamando e capitan y tripulante bon bini na nos isla y a wordo acompaña pa Charlayne Koolman cu a haci entrego di plakkaat na e capitan. A.P.A., cu a wrodo representa door di señor Johnny Martes, tambe a intercambia plakaat cu capitan Mercier de Lacombe. Ministerio di Turismo, representa pa Xena Profet, tambe a gradici e capitan y tripulante pa cu nan prome bishita riba nos isla.
E delegacion di Aruba a ricibi un gira di e barco crucero luhuso aki for host Amanda Parry. Asina aki por a observa e luhoso restaurantnan exlusivo y tambe e 4 pintura di Picasso original abordo di e crucero.
Seven Seas Explorer tin un capacidad maximo di 750 pasahero afluente cu un tripulacion maximo di 650 hende. E crucero ta ofrece acomodacion luho unda tur camber tin bista riba lama.
Den e delaster luna Aruba tabata tin e honor pa a yama bon bini na diferente barco crucero pa prome biaha, y hasta di a bira e prome den region pa a ricibi Seven Seas Explorer. Apesar di ta drentando den temporada druk di dianan di fiesta, nos centro comercial lo experencia bishita additional di e pasaheronan crucero pa cu e temporada halto aki. Asina aki ta poni riba schedule cu dianan 11, 13, 14, 20, 23, 26, 28 di December lo bay tin mas cu 1 barco crucero den waf, cu lo conduci na un afluencia di bishitantenan riba nos isla. Esaki lo percura cu nos centronan di isla lo ta mas yena cu trafico y cu nos comerciantenan lo tin oportunidad adicional pa genera benta.