Setar NV a haci entrega di nan presupuesto 2019 na Minister Chris Romero

0

Durante un reunion hunto cu tur accionista di Setar NV, sr. Roland Croes, como Director di e compania estatal, a haci entrega oficial di presupuesto 2019 na Minister Chris Romero. Manera ta nan custumber, Setar NV a haci entrega di nan presupuesto na tempo y asina cumpli cu Minister Romero su expectativa pa cu e compania estatal aki.

E presupuesto y plan di inversion cu Setar NV a presenta na Minister Romero ta ilustra e proyeccion pa 2019 di e compania. Por mira cu nos compania estatal di telecomunicacion ta realisando tur diligencia necesario pa asina keda mantene como pionero den telecomunicacion na Aruba y Caribe. “Mi ta sinti sumamente satisfecho di mira con Setar NV ta keda mantene un stabilidad financiero pa tur e añanan aki. Pero tambe e ta sumamente prometedor pa mira e planes cu Setar tin pa futuro”, Minister Chris Romero a duna di conoce.

Den e mundo actual cu nos ta bibando aden, nos por ta testigo cu tecnologia ta algo cu ta evoluciona practicamente riba un base diario. Pa e motibo aki Setar NV mester keda na vanguardia di tecnologia den e ramo di telecomunicacion. “Comunicacion mobil ta algo esencial awendia, pero banda di esey nos por mira cu cada dia nos ta mas dependiente di internet pa realisa nos tareanan diario. Aki ta unda cu Setar NV, como compania estatal, mester keda modernisa su mes den e ambito di telecomunicacion,” Minister Romero a declara.

Comments

comments