Desde aña pasa SETAR a pone como un di su metanan principal pa desaroya servicionan nobo y innovativo pa facilita y alabes mehora e experiencia di su clientenan.
A haci un sondeo extenso, a papia cu e clientenan pa tende kico ta e motibo cu nan ta bishita SETAR, con nan lifestyle ta, kico ta e cosnan cu nan no ta contento cun’e y tambe a tuma nota di sugerencianan cu nan por tabata tin.
“Y nos a tende y analisa esaki !! Y nos a traha un plan pa por mehora e experiencia di nos clientenan.”, asina Marlushka Scheper, Customer Interface Manager di SETAR a expresa.
El a sigui splica: “den cuadro di esaki nos a cuminsa na lansa nos servicio di MiSETAR.
MiSETAR ta nos “online portal” caminda cu clientenan por login di nan cas of oficina via nan computer, tablet of celular y asina por haya mas informacion di e.o. saldo di nan cuenta, uso di nan celular como tambe cumpra algun add-on bundles manera e.o. e bundle di data of roaming bundles. Tambe tur luna manera cu nos caba di traha e cobransa nos clientenan cu a registra na MiSETAR lo ricibi un e-mail cu informacion di nan cobransa y nan por login den MiSETAR pa haya mas detaye di esaki.
Tur esaki y mas servicio cu pronto ta na caminda pa nos por yega mas cerca di nos clientenan”.
Sra. Scheper a sigui splica cu fuera di MiSETAR SETAR a bay wak tambe con por mehora y facilita e servicio pa e clientenan cu ta bishita e Teleshopnan.
“Tur luna nos tin un cantidad grandi di cliente cu ta bin na un di nos Teleshopnan pa por paga nan cobransa of pa cumpra un carchi pre-paid pa recarga nan celular. Pero manera cu nos tur sa, awendia nos tur tin pura y ta desea di por keda atendi mas lihe posibel“.
Pa haci esaki mas facil y mas lihe SETAR a trece su Self Service Kiosk.
E SETAR Self Service Kiosk ta un proyecto caminda cu SETAR conhuntamente cu Aruba Bank y un compania Canades a traha pa desaroya un Self Service Kiosk na unda e un cliente mes por acudi na e y paga su cuenta y cobransa of recarga su celular prepaid.
SETAR ta gradici Aruba Bank pa a kere den e proyecto y pa a traha hunto pa por a desaroy’e. E cliente por paga cu placa cash y por usa un carchi Maestro (Debit card), pa por paga.
Segun sr. Marc Kwaad, Executive Director na Aruba Bank, encarga cu tecnologia y innovacion: “Aruba Bank ta un firme creyente cu pa medio di colaboracion y partnership metanan comun ta keda alcansa cu exito.
“Nos ta hopi contento di por a duna SETAR e support den nan esfuersonan innovativo. Nos a busca y hala recursonan hunto pa trece e producto nobo aki di SETAR, e SETAR Self Service Kiosk, cual ta unico den su categoria na Aruba y Caribe, cu ta hacienda uso di Aruba Bank su EMV/Chip/magnetic stripe solution.”, asina Sr. Kwaad a expresa.
E prome 3 kiosknan ta den funcion caba y nan ta situa na Teleshop Irausquin Plein, Palm Beach y Sero Blanco.
Tin plan pa den futuro bin cu mas di e kiosknan aki na otro localidadnan y pa asina facilita e clientenan di SETAR un manera hopi liher y fácil di paga nan cobransa of recarga nan celular prepaid.