SETAR a lansa un projecto di Hack-A-Ton “Island of the Future – Agriculture” den cual a invita varios scol secundario pa participa.
E scolnan cu a registra pa participa na e projecto aki ta: Abraham de Veer School, Colegio San Augustin, La Salle College, Mon Plaisir College, EPB San Nicolas, Colegio Arubano Oranjestad y Maria College.
SETAR a bin cu e Hack-A-Ton pa stimula studiantenan na e scolnan participante pa bin cu solucionnan innovativo riba e area di agricultura cu por wordo implementa na cualkier cas na Aruba. Asina SETAR kier aporta na conocemento di Aruba su propio agricultura y stimula desaroyo riba e area aki. Agricultura ta referi na planta y cria combina cu posibel inovacion tecnologico. Den e ultimo tempo por observa varios cunucero local cu a cuminsa planta y cria den diferente bario.
Cada un di e scolnan cu ta participa den e Hack-A-Ton mester traha un grupo di 6 lider cu lo involvi henter e scol den e proyecto pa hacie un exito. E unico exigencia ta pa e studiante ta inscribi na e scol participante.
Tur scol participante ta ricibi un suma pa por realisa e proyecto durante un temporada di 5 luna. Rekisitonan ta, entre otro, cu e projecto mester ta bon pa medio ambiente, e mester haci uzo di automatisacion y mester tene cuenta cu gasto di produccion. E meta principal ta pa haci Aruba un isla mas sostenibel den cuminda.
Tur e scolnan menciona tin te cu dia 10 di april 2019 pa presenta nan proyecto pa medio di un presentacion pa un penal di professionalnan riba e tereno. Santa Rosa lo forma parti di e panel y lo ta un fuenta pa informacion pa e studiantenan durante henter e periodo.
E studiantenan ta liber pa usa nan creatividad via medionan social pa por presenta y mercadea nan producto final.
SETAR lo duna a cambio premionan hopi atractivo pa e 3 scolnan ganador.
E premio maximo pa e skol ganador ta Awg. 25.000, ganador na di dos lugar ta haya e premio di Awg. 10.000 y e scol ganador di 3 lugar ta ricibi Awg. 5.000.
Durante e periodo lo mantene e publico al tanto di e projecto aki.