SETAR durante henter aña ta aporta na diferente instancia y fundacionnan cu ta yuda nos comunidad di un manera of otro. Desde e pandemia nos fundacionnan tambe ta pasando den momentonan dificil. Pa e temporada di Fin di Aña, SETAR a haci un donacion na tres fundacion p’asina nan por sigui duna sosten na comunidad y tambe na nos mascotanan.
Representantenan di SETAR a haci entrega di AWG 5.000 na Fundacion Santa’s Cause cu ta reparti regalo pa nos muchanan y hobennan di menos recurso durante e temporada di Fin di Aña. Fundacion Stimami Sterilisami a ricibi un donacion di AWG 10.000 p’asina por sigui cu nan programa di sterilisacion di pushi y cachonan cu ta na cas of riba caya. Y Fundacion Pa Nos Comunidad a haya un donacion di AWG 15.000 na comestibel y alimentonan basico pa por sigui yuda esnan den necesidad.
Asina aki SETAR, como nos compania nacional di telecomunicacion, ta sigui aporta na nos comunidad cu e meta semper pa haci un diferencia y yuda nos comunidad realisa cada meta un pa un.