Amantenan di Seso Sport, e wardamento a caba, e ora tan spera pa enfrenta otro cu celebro a yega! Diasabra, 5 di November, Club Primavera lo bolbe organisa a multiple peticion, otro candeloso anochi di hersengymnastiek! Manera ya ta custumber, por inscribi via whatsapp na cellular 564-9838, tambe e inscripcion lo cuminsa pa 7:30 di anochi, y contribucion lo ta 10 florin pa participante, cu’n maximo di 6 partisipante pa ekipo. Nos ta pidi encarecidamente pa ta na ora, ya cu esun cu yega prome ta bebe awa limpi, y luganan ta bay ta limita. Ultimo encuentro Club Primavera tabata rand rand, y tur mesa pa participante a wordo ocupa. Un palabra di danki di parti di directiva di Club Primavera pa e entusiasmo y acohida di pueblo!
Locual si a laga un smaak menos sabroso ultimo biaha ta e hecho cu varios miembro di comission hersengymnastiek, y tambe varios participante, a ripara cu durante wega tabata tin varios ocasion caminda participantenan ta “cheat” via celular. Sea nan ta Google scondi, of compinchinan ta Google na banda y manda contesta via whatsapp. Nos kier pidi un y tur pa por fabor ban tene nos dushi Seso Sport limpi y “doping free”. Nos lo pone extra atencion ariba e cos aki e biaha aki, y si tin mester, lamentablemente lo tuma accion pa esnan cu si ta hunga limpi no wordo perhudica.
Pues diasabra 5 di November e grill lo ta na candela cu su fabuloso y famoso spetada, e bar y cushina lo ta bon surti manera di custumber, y e tension lo ta di corta rosea manera semper! Bo sa di cua pais Donald Trump su famia ta bin originalmente? Bo sa di cua estado Hillary Clinton ta bin? Bo sa pakico e mascota di e Democratanan ta un burico? Bo sa con yama e president di Merca cu nan tabata yama “honest”? No? Wel bin Club Primavera diasabra 5 di November pa 8’or di anochi y sorprende amigo y famia cu bo conocimento… e soppi ta na candela, yegaaaaa!!