KRALENDIJK- Cerca di 35 studiante Caribense y Young Profesionals diabierna tabata tin un sesion informativo tocante un trabao paga na Bonaire. E proyecto TOP Bonaire ta un iniciativa di Ministerio di Relacionnan Interior y Asuntonan di Reino (BZK). Meta di e proyecto aki ta pa reinforsa e marco profesional, conhuntamente cu e Openbaar Lichaam Bonaire, Bonaire Holding Maatschappij (BHM) y varios otro partner riba e isla.
Studiantenan di HBO y di Universidad a mustra entusiasmo riba e trayecto ofreci. E ta duna oportunidad na talentonan procedente di un di e seis islanan. Un gran mayoria, despues di e reunion, a bisa di lo manda un solicitud. HR Manager Judith Brekelmans, di Bonaire, a duna e hobennan mas entusiasmo: “Bonaire ta den pleno desaroyo y boso como e generacion nobo ta un necesidad pa e isla, por lo tanto boso ta bon bini”.
E solicitantenan Caribense tin varios background estudiantil: bestuurskunde, ley, criminologia, pero tambe historia arkitectonico, veiligheidskunde of bouwkunde. “Pensa out of the box y motiva na kico abo lo por aporta na e diferente organisacionnan cu a ofrece e practicanan aki”, segun HR manager Brekelemans. E coordinador di e entrenamento, Rianda Sacre, na nomber di e dunadonan di trabao Boneriano a splica na ki tipo di empleado nan ta busca en principio.
Ta trata aki di un traineeship di 2 aña cu un coaching intensivo y e posibilidad pa haya experiencia na varios luga. En principio ta pensa pa cuminsa na September cu e prome grupo di trainees cu lo wordo selecta e siguiente lunanan. e informacion aki, organisa door di Stichting WeConnect, den cooperacion cu Ministerio di BZK, ta e prome fase di e trajecto.
Manager di e programa di BZK Programmamanager, Rintje Oenema na final di e sesion informativo a bisa di ta sumamente satisfecho: “Esaki ta un comienso fantastico pa e TOP Traineeship Bonaire. E interes, e entusiasmo y e calidad di e participantenan, increibel! Pa nos esaki ta un confirmacion di e necesidad di un traineeship y un estimulo pa haci di esaki un exito!”.