Internacional: E Servicio Postal di Merca diaranson mainta a anuncia cu e lo sigui acepta paketenan internacional entrante for di China y Hong Kong despues di a bisa diamars anochi laat cu e lo suspende nan.
Aunke no a duna motibo pa e suspension inicial di entrega di pakete for di China, Servicio Postal a sugeri diaranson cu e tabata relaciona cu tarifanan nobo impone diamars y eliminacion di e exoneracion. E
Exoneracion aki a permiti cualkier hende, incluso exportadonan, pa manda paketenan na balor di menos cu $800 pa Merca sin impuesto of mester a haci inspeccion. Inspeciona e paketenan cu ta drenta pa cobra e impuestonan nobo di importacion por resulta sumamente dificil.
“USPS y Duana y Proteccion di Frontera ta trahando estrechamente hunto pa implementa un mecanismo di cobramento eficiente pa e tarifanan nobo di China pa garantisa e minimo interupcion na entrega di pakete,” e Servicio Postal a bisa den un declaracion diaranson.
Beijing a tuma represaya contra e tarifanan nobo di Trump cu un pakete amplio di medidanan economico diamars, incluyendo un impuesto di 15% riba cierto tipo di carbon y gas natural likido, y tambe un tarifa di 10% riba zeta crudo, mashinnan agricultura, autonan di desplasamento grandi y truck di pickup. E medidanan lo drenta na vigor entrante 10 di februari.
Tambe el a impone controlnan nobo di exportacion cu ta dirigi riba dos dozijn di productonan di metal y tecnologianan relaciona, y a agrega dos firma mericano, e compania di biotecnologia Ilumina y e bendedo di moda PVH Group, na su lista di entidad inconfiabel.
