Esaki ta bira e aña top den historia di number di auto di hende cu no a paga cu sigur ta algo dimas pa e ley di paga nan belasting, pa cual Meverly Romano ta splica kico por ta pasando. Esaki ta un cifra cu tin cu bisa cu den tur e añanan anterior cu Romano ta comunica riba number di auto, esaki a yega un top e aña aki. Nos ta den December y 46 mil no a cumpli. Esey ta nifica cu ta un cantidad enormemente halto. Den pasado ta cera December mas of menos 3% cu no a cumpli of 7% cu no a cumpli. Ultimo aña el a yega 30%, pero awor aki ta na 62% di incumplimento y esey ta algo cu ta hopi tristo.
Romano a splica no ta e unico factor di e hecho di sticker. Esaki por ta un di e factornan. Ora cu ta cambia plachi tur aña y na moda di papia dado momento e automobilista ta haya su mes obliga di paga su belasting pa asina e por tin su plachi nobo pasobra di leu e por ripara si ta plachi bieu pa plachi nobo. Door cu ta uzando e mesun plachi ya pa algun aña y no ta mira di biaha si e persona ey a paga su belasting of no. E unico indicacion cu tin awor aki ta e sticker.
Romano a agrega cu den e ultimo simannan a purba di haya reunion cu cuerpo policial, cual no a sosode ainda. Por compronde cu cuerpo policial tambe ta hopi ocupa. Ora cu sinta hunto cu Cuerpo policial, kisas por haya mas claridad riba esey. Pa e parti di control no por duna un splicacion awor aki.
Servicio di Impuesto sigur lo tuma paso y ta bastante placa cu no ta drentando manera mester ta.
Si wak e sifranan di 2015 y 2016 si pone tur hunto ta bira algo basta serio pa loke ta e cifranan di hende cu no a paga nan number di auto.
Tin cu bisa cu por ehempel pa 2015 ta hinca den 2016, pasobra logicamente si no a caba di paga 2015, bo ta poni tambe como un verzuimer den aña 2015. Pa 2015 ta yega na un total di 5795 cliente cu no a paga 2015 completamente cu tambe ta un cantidad grandi. Logicamente si no a paga 2015, no tin 2016 tampoco paga, kiermen bo ta aparece den e cifranan cu a wordo duna di 2016. E clientenan aki ta importante pa nan sa cu nan no ta bay wordo permiti pa paga 2017 tanten cu nan caba di paga e dos añanan ey. E momento cu tin un number registra y e persona tin su number y ta coriendo cun’e y no a entrega e plachi na Belasting pa duna indicacion cu e no ta uzando su plachi, Servicio di Impuesto ta keda cobr’e, pa motibo cu e por ta coriendo masha bon cu su auto riba caminda. Ta keda cobr’e periodonan ey cu no tin pago registra.
Romano a splica cu por obliga e cliente pa paga pasobra na momento cu tin e registro asina eynan y no a notifica Servicio di Impuesto cu no ta bay uza e plachi, pasobra e unico manera pa haya dispensacion di belasting, e ora e periodonan ta keda core. Pesey tambe awor aki tur aña ta haya clientenan cu ta bin bisa cu kisas e auto no tabata core, e auto pa un of otro motibo tabata para, e persona aki kisas tabata den exterior. Pero no ta bay haci excepcion. Nan no por proba cu e auto no tabata riba caminda. Nan lo mester paga e periodonan ey bieu prome cu nan por wordo permiti pa paga 2017 y mesun cos ta conta tambe pa e clientenan cu por ehempel tin dos auto. Un di nan no ta paga manera mester ta, pero e otro si ta wordo paga na tempo.
Si e kier bin paga riba su di dos auto cu si ta up to date, no lo bay permiti haci pago tanten cu e tin e otro auto cu e no a caba di paga completamente. Esey tambe ta un punto di atencion pa esnan cu tin mas cu un auto y cu nan no tin e belasting paga riba e otro autonan ey completamente cu nan lo mester percura pa ta al dia pa nan tin e belasting completamente paga prome cu paga 2017.