Servicio di Impuesto, manera custumber, ta yudando clientenan pa yena nan papel di Inkomstenbelasting. Segun vocero di e departamento, Meverly Romano, e siman aki a start cu e campaña pa yena formulario di inkomstenbelasting di 2015. Esaki por bisa ta un custumber caba, pasobra ta organis’e desde 1994, y e acogida ta hopi bon. Clientenan di tempran caba ta cuminsa puntra ki dia ta cuminsa cu e campaña aki y actualmente e ta den full swing. Ta dunando ayudo na YMCA na San Nicolas y na Camacuri. Nan ta na piso uno di e oficina principal y na piso abao tambe tin un seccion caminda cu a pone tres camber disponibel pa yuda e clientenan cu tin dificultad pa subi trapi. E ta bayendo hopi bon.
Ayera a cera un total di 145 cliente cu por a yuda na San Nicolas y 134 na Oranjestad. Y ni pa merdia, tabata tin 133 persona yuda caba. Kiermen no por keha, segun Romano. Servicio di Impuesto ta contento cu e acogida y constantemente tin cliente cu ta yega. Nan ta bin cu nan formularionan y logicamente ta pidi nan tambe si nan por bin cu nan documentonan cu ta necesario pa yena e formulario, esta e resumennan di salario, resumen di pensioen por ehempel, e gastonan cu ta fiscalmente deducibel tambe. E clientenan por lo general ta na altura di loke nan tin cu trece pa por yena e formulario y directamente despues nan ta entreg’e tambe y asina cumpli cu e obligacion ey di yena y entrega e formulario.
Romano a sigui informa cu ta cuminsa pa 8’or di mainta pa 4’or di atardi nonstop y ta continua te cu dia 30 di November, cu e campaña di ayudo aki. E ultimo dia di acuerdo cu ley lo bira dia 1 di December proximo. Esey ta e termino legal cu e clientenan tin pa entrega e declaracion. Tin cu bisa acerca cu e aña aki a dicidi pa extende e termino di entregamento, pa motibo cu tur aña ta haya hopi cliente ta haci peticion pa prolongacion di e termino. E biaha aki departamento di Impuesto a dicidi pa esnan cu no ta alcansa pa entrega nan formulario di declaracion pa dia 1 di December, despues di esey automaticamente nan ta haya 6 luna mas di tempo pa por entrega e formulario aki.
E ora e deadline ta bira dia 1 di Juni, 2017. Despues di esey e ora si e cliente no ta bay haya mas prolongacion di termino pasobra seis luna ta un tempo basta suficiente, plus e dosnan cu ley mes ta duna, ta 8 luna, cu ta pensa cu ta mas cu suficiente tempo pa e por completa su declaracion. Awor aki, si e cliente no ta bay alcansa pa entrega su declaracion pa dia 1 di December, e no tin mester di entrega un peticion y pidi pa prolongacion di termino, sino automaticamente Departamento di Impuesto lo dun’e e prolongacion di seis luna.