Servicio na Hulpbestuurskantoornan ta bay reanuda dia 14 di December, asina a keda anuncia diamars mainta door di Omar Harms di Ministerio di Asuntonan General. E fecha mester a wordo pospone cu un siman mas pa motibo di logistica, caminda carga di ekipo no a yega na Aruba na e tempo stipula originalmente. Pa cu esaki a yama un conferencia di prensa duna aviso na publico en general, pidi disculpa pa e inconveniencia causa y danki pa e comprension. Renobacion di e sistema di IT na e Hulpbestuurskantoornan ta sumamente necesario pa, den futuro, por ofrece un miho servicio na e usuarionan sin interupcion.
Actualmente ta sperando e ekiponan di computer, server y software yega cu barco pa despues e pasa door di proceso di Douane. Despues e compania encarga, esta InfoTrans tuma posesion di e carga pa haci control di dje y di eynan transporte pa cada sede di Hulpbestuurskantoor. E siguiente stap lo ta instalacion y test door di ITP y Censo, asina Harms a splica. Mientras tanto personal di e departamentonan aki ta asistiendo na training pa asina nan conoce y ta prepara riba con pa traha cu e sistema nobo.
E retraso den reanudacion di servicio ta conta solamente pa sedenan di Hulpbestuurskantoor, esta na MFA Noord y Paradera, Hulpbestuurskantoor na Santa Cruz, Savaneta y San Nicolas. Servicionan na sede principal di Censo na Oranjestad ta cla pa habri bek diaranson 7 di December pa brinda servicio na publico. Tambe ta bon pa informa cu e interupcion di servicio no ta afecta e funcionamento di Servicio di Impuesto na MFA.
Semper tin posibilidad pa keda cla cu e trabounan prome cu dia 14 di December y si esey ta e caso, lo habri lo mas pronto posibel y avisa publico di esaki. “E fenomeno cu computer ta down of server a pega, lo keda pa pasado,” asina Omar Harms a duna di conoce.