Hopi hende no sa para keto y wak kico ta e trabou di un persona cu ta traha riba ambulance ta. Liberato Hoek, hefe di e departamento aki ta splica kico e trabou aki ta awe compara cu antes.
E siman aki ta internacionalmente e siman di ambulance. E aña aki no ta celebre na grandi manera den pasado, pero si ta para keto na dje, mirando cu e ta un servicio cu ta hopi importante pa e comunidad di Aruba. Hopi biaha hende no ta para keto kico ta un trabao riba ambulance. Ta un trabao cu hopi responsabilidad y nunca no sa kico ta sperabo ora bo subi warda. Mainta un hende no ta lanta y bisa cu awe ta bay tin mester di ambulance pasobra no sa ki dia tin mester di dje. Un hende cu ta sufri di malesa cronico, ta unico cu ta pensa cu hopi biaha ta spera cu no mester di e servicio di ambulance awe. Pero cada trahado di ambulance, si ta lanta mainta bin traha cu e pensamento di ta spera di haci nan trabao mas miho cu ta posibel. Pa duna e servicio manera cu mester ta.
Hoek ta sigui splica cu e tin su retonan, mirando cu si coy tres aña pasa, no ta e mesun cantidad di yamadanan pa ambulance cu awendia. E cantidad ta subi. A confronta cu mas accidente pa dia. Mas hende cu ta bira malo. E cantidad di hendenan cu malesa cronico ta hopi mas cu tres of cinco aña pasa. Ta hayando mas melding. E trafico ta bira dia pa dia mas druk. Mas accidente, hendenan cu no ta tene cuenta cu e parti di siguridad.
Sigur mester educa comunidad. Aunke cu tin tres ambulance den cada warda, y de bes en cuando un Rapid Response, tin biaha esey no ta suficiente. Si wak un accidente cu tres of cuater herido, eynan ta uza full un capacidad cu tin na ambulance. Pesey hopi biaha ta importante cu na momento tin un incidente cu yama 911, ta importante pa bisa kico ta pasando. Eynan ta purba di filter si en berdad mester di un ambulance si of no y cuanto ambulance lo bay tin mester. Cu e capacidad di tres auto, tin biaha e ta tiki.
Ta hopi bon pa hende sa pa kico bo ta pidi ambulance y no yega pidi pa pidi segun Hoek.
Pesey hopi biaha e ta cuminsa na e melding. E momento cu pidi pa un ambulance ta importante pa sa pakico tin mester di un ambulance. Un hende cu dolor di stoma, no tin mester di un ambulance. Un hende cu por bay cu su mesun transporte pa busca cuido medico. Ta bay bezet un ambulance e ora sin tin mester, siendo cu un hende cu haya un atake di curason, si tin mester di un ambulance.
Den pasado a yega di haci esaki cu plataforma di salud. Pero e aña aki no a trece esaki dilanti. Esey ta e unico manera pa educa e hendenan ki ora en berdad tin mester di un ambulance.
Esunnan cu ta ricibi yamada, segun Hoek, e relacion ta bay hopi bon. Solamente tin cu tene cuenta cu e hendenan aki no tin un antecedente medico manera cu ambulance tin’e. Semper nan ta haci nan best y hopi biaha nan mes ta yuda nan cu kico ta importante pa sa na momento cu un yamada drenta.
Liberato Hoek ta felicita tur e trahadonan di ambulance, pasobra tur dia nan ta yuda tur hende cu e ekiponan cu nan tin. Ta un parti innovativo cu nan ta bin cu ekiponan hopi nobo. Nan tin un mashin cu yama Lucas, cu ta duna massage di curason, reemplasando un hende cu yuda hopi bon, cual ta un parti di ambulance. Ambulance ta un mundo riba su mes. Si bo no ta traha aden, bo no sa kico e ta. Tur dia e tin su retonan. Pesey ta bisa hopi biaha cu personal di ambulance ta haci su maximo esfuerso pa duna e servicio manera cu mester ta, segun Hoek.