Hefe di Departamento di Ambulance, Sr. Liberato Hoek ta splica tocante e preparacionan pa cu Semana Santa.
Manera añanan anterior, nan ta cla pa brinda e asistencia medico necesario. E aña aki nan ta bay tin, manera custumber, 3 ambulance den cada warda, nan postnan lo ta na Imsan, Wayaca y Schotlandstraat. Na momento di cualke tipo di incidente, nan ta pidi si pa e personanan cu yama pa duna informacion necesario, cu ta importante pa e personal di ambulance haci nan trabao.
Segun Sr. Hoek, e informacion ta keda mesun cos cu durante temporada di Carnaval. Dus kico a pasa cu e persona, si e ta hala rosea, si e tin pulso, y si e tin historia medico. Importante pa e personal sa cu si e persona en cuestion ta uza cualke tipo di remedi, y vooral si nan ta bay campa pa nan tuma esakinan na tempo y pa ta cuateloso pa cu bebemento di alcohol.
Meldingnan por ehempel, tabata pa luz y pa Semana Santa en principio ta uza, ta pidi pa duna specificamente, cua parti di e beach e incidente a sosode. Tambe pa tin un hende ta atento pa ora cu ambulance yega pa mustra unda e persona cu a bira malo ta.
Tambe Sr. Hoek di Departamento di Ambulance ta pidi pa ta extra cauteloso, vooral cu mucha, pa tene bon bista, si nan ta bay landra, zorg pa bebe suficiente likido y hunta nan curpa cu sun block . Y pa un adulto, si nan ta sufri di algun malesa, pa nan tuma nan remedi na tempo. Pa esunnan cu ta uza e careteranan, pa please uza seatbelt y si ta bay bebe, pa zorg pa tin un hende pa stuur.
Practicamente pa temporada di campamento, ambulance ta haya masha poco melding. Y si tin melding mes esaki ta pafo di campamento. Na 2016, nan a transporta 68 persona di cual 51 tabata pa motibonan di malesanan interno, dus presion halto, sucu, problemanan di curason of neurologico. Tambe tabata in 12 caso di accidente y 19 caso di trauma. Dus parti di accidente, semper ta keda hunga un rol durante e dianan di fiesta.
Por ultimo, Sr. Hoek ta pidi pa tur hende ta atento y pa yama 911 si cualkier cos pasa. Den trafico, uza seatbelt, ya cu esaki por haci un diferencia sigur.