Serlimar: Un Carnaval Dushi ta un Carnaval sin Sushi

Un Carnaval Dushi ta un Carnaval sin Sushi, ta e mensahe di Serlimar Sui Generis pa e temporada di Carnaval 65. Un periodo di fiesta nacional, caminda gran parti di nos comunidad di Aruba ta goza y disfruta di musica, evento, paradanan y hopi mas. Un temporada dushi pero alabes e temporada cu nos ta acumula mas hopi desperdicio compara cu e resto di aña.

Serlimar tin hopi aña ta participa como un di e stakeholdersnan di mas importante pa cu e celebracion di Carnaval en conexion cu e maneho di desperdicio pa asina mantene Aruba limpi. Serlimar tin entre otro 16 aña ta ubicando su barinan rondo ariba ruta di Carnaval pa e publico carnavalesco por tira nan sushi. Serlimar tambe ta responsabel pa haci tur ruta limpi despues di cada parada di Carnaval cu ta wordo organisa. Alabes Serlimar ta reparti saco di sushi entre e publico prome cu e ultimo paradanan grandi. Tur esaki cu e meta principal pa mantene nos dushi Aruba limpi durante e temporada di Carnaval.

Pa Carnaval 65 Serlimar a tuma e direccion pa engradece su participacion den e celebracion di Carnaval y pa es motibo a introduci e lema pa Carnaval 65; “Un Carnaval Dushi ta un Carnaval sin Sushi!”. E lema aki ta nifica cu durante temporada di Carnaval tur hende por tuma e decision corecto pa asina cuida nos medio ambiente y sigui goza di Carnaval conscientemente. Esaki ta encera promocion pa eco-containers caminda lo recicla hunto cu e organisacion local Plastic Beach Party y alabes un campaña di conscientisacion pa reduci e compra y uzo di plastic di un solo uzo, segun e ley nobo cu ta prohibi plastic di un solo uzo. E conscientisacion mas importante ta pa nos comunidad haci mas uzo di productonan reuzabel y eco-friendly durante e temporada di Carnaval. E lema aki lo wordo incorpora den diferente campaña durante periodo di Carnaval 65 di Serlimar.

Serlimar e aña aki tambe lo ta participando un bes mas den e Festival unico di Disfraz Recicla cu ta wordo organisa pa Dennis Burke na Centro di Bario Playa Pabou. E Festival aki ta pa tur scol basico na Aruba, caminda ta encurasha e participacion pa presenta nan creatividad cu material reciclabel. Esaki ta netamente locual cu Serlimar ta para tras di dje cu ta relata na e lema pa Carnaval 65 y alabes ta e enfoke di un campaña nobo cu ta promove e creatividad cu material reciclabel cu pronto lo wordo introduci.

E meta di Serlimar Sui Generis ta pa yega na e nivel di conscientisacion caminda Aruba henter por participa na Reduci, Reuza y Recicla pa asina duna cierto tipo di material un di dos bida y tambe siña nos futuro generacionnan con pa anda cu desperdicio na un forma responsabel cu e meta principal pa cuida nos medio ambiente y mantene nos dushi Aruba limpi.

Comments

comments