Sr. Henley Director di Serlimar a duna di conoce cu nan ta trahando den estrecho cooperacion di City Inspector pa loke ta e dump ilegalnan aki. E control riba Dumpnan ilegal mes ta cai full bao di Bureau City Inspector pero Serlimar ta na altura di esakinan y hunto cu dicho departamento ta den deliberacion pa wak con ta atende cu e parti aki inmediatamente. E director di Serlimar a bisa si cu ta trata aki di un tereno priva pues e hecho aki ta haci’e un tiki mas complica pero pa leynan ambiental esaki no ta permitibel. Pues ta trahando duro riba e situacion aki pa toch duna ayudo di parti Serlimar pa resolve esaki mas lihe posibel. E director di Serlimar a sigui bisa cu dos lugar riba Aruba ta permisibel pa deposita desperdicio cu ta na Dump di Parkietenbos y e Ser’i Thijshie pero, segun e director di Serlimar, kizas e costonan cu tin mara na dje ta haci’e cu personannan cu tin terenonan priva ta permiti pa nan tereno wordo usa pa deposita desperdicio y asina dumpnan ilegal ta wordo crea. Pero netamente pa esaki y pa cuida nos medio ambiente cu Serlimar a bin ta propaganda semper, nan ta trahando duro riba esaki pa resolve e situacion mas liher posibel. E director di Serlimar a mustra cu mester bai wak kico e material cu tin tira riba e tereno aki precies ta p’asina por determina ki ta e siguiente pasonan. Manera ta conoci tin e “up cycle centrum” cu tin regla y regulacionnan y cu por tuma desperdicio eynan y esaki ta bira parti di e “circle economy” cu Serlimar a bin ta propaganda y tin materialnan di construccion cu mester bai e ora Parkietenbos. Pero e ta depende paso aworaki ta den e fase di wak y tuma nota precies kico e material ta y ki cantidad pa e ora por deshaci di nan na e manera corecto. Serlimar tin departamentonan cu ta encarga cu mantencion di bario cu ta tambe duna control di calidad cu parti di nan trabao pa controla cu no tin dumpnan ilegal ta lanta. Y akinan e director di Serlimar ta bisa cu berdad nan ta haya rapportnan riba e situacionnan aki y ta constata cu tin dumpnan ilegal ta lanta tur ora y nan ta comparti esakinan cu Bureau City Inspector pa conhuntamente den un forma di team pr “tackle” tur e esakinan y atende cu nan na e manera miho posibel. Mester haci esaki pasobra msrer evita cu esakinan ta crea “overlast” pa barionan y cosnan cu ningun hende kier den su medio ambiente.