Lionel Croes, vocero di Serlimar, ta start sali cu un accion di baki di sushi den bario. E ta sigui splica cu mirando cu nos ta den porta di fin di aña, Serlimar tin e acostumbrado accion di limpiesa den bario cu ta organisando pa hopi aña caba. Esaki a bira un tradicion y pesey mes, hunto cu su stakeholder, den e caso aki ATA, ta join pa di dos aña, pa asina tene un accion di limpiesa den diferente bario. A scoge cuater bario grandi di e pais, caminda cu diadomingo awo, ta inicia for di 8’or di mainta, den e bario di Noord. Esaki lo ta specificamente na Colegio Felipe B. Tromp, riba e parkeerplaats. Akinan caba ta extende un invitacion na tur habitante di cada bario, pa haci bon uzo di e proyecto aki cu ta organisando hunto cu ATA. Sa cu tambe ta yuda pa tene e prevencion mas abao posibel di chikungunya, zika y dengue, pues ta vital importancia pa comunidad responde na e accion gratuito aki cu Serlimar hunto cu ATA ta organisa.
Ta bay tin un total di 4 accion, cuater diadomingo. Ta cuminsa primeramente riba e prome cu ta bira dia 27 di November, manera menciona na Noord y dia 4 di December riba diadomingo tambe, lo toca turno na e bario di Dakota, den Don Elias Mansur Ballpark, caminda cu lo bay tene un di dos accion di medio ambiente of miho bisa Millieustraat y dia 11 di December, e lo toca turno na e bario di San Nicolas caminda cu antes tabata ex Lucky Store. Esaki ta e prome tres accionnan y e ultimo lo toca turno na Centro Deportivo Rooi Afo, caminda cu habitantenan di Piedra Plat, vecindario, Rooi Afo, Piedra Plat, Cumana, Playa, por bin haci uzo tambe di e proyecto aki cu ta completamente gratis. Esun di dia 18 di December, ta na Centro Deportivo Rooi Afo. Aña pasa a haci hopi enfasis mirando cu a cambia di localidad. Den pasado tabata haci’e riba tereno di Aruba Bank na e rotonde di Paradera, pero mirando cu tin un otro proyecto a haya obliga di haci uzo di un otro localidad. Serlimar ta tene pueblo informa cu esaki lo ta na Centro Deportivo Rooi Afo.
Serlimar ta contento cu e generosidad di ATA cu a join Serlimar den e proyecto aki. Nan ta mira e importancia pa mira nos isla Limpi. Logicamente ta saludabel pa nos habitantenan y tambe ta crea un bon impresion cerca nos bishitantenan, mirando cu Aruba su pilar economico te awor aki, number uno ta turismo. Di parti di gerencia ta contento cu e aporte substancial cu nan ta ricibi di parti di ATA.
En breve e caya di medio ambiente ta encera deposito di grofvuil. Ta importante pa tur usuario cu ta bay haci uzo di e proyecto aki pa sigui instruccionnan tambe di e opzichternan cu lo bay tey presente pa guia henter e proceso. Tin cu tene bon cuenta cu guia cu lo bay tin e dia aki. Sigui tur instruccion pa por evita cualkier incertidumbre cu por presenta durante e actividad aki.
Hopi importante tambe pa e usuarionan tene cuenta cu por haci uzo di grofvuil. Por trece bo wasmashin of frigidaire bieu cu no tin mas obheto di cura manera muebles cu no ta haci uzo mas di dje. Tur esakinan hunto cu troncon di mata, por tira afo y completamente gratis. Esaki ta bira specialmente pa asisti y mustra su compromiso cu Aruba, Serlimar pa hopi aña ta haciendo e evento aki y ta spera di curason cu cada habitante por tene cuenta y haci bon uzo di e proyecto aki, segun Croes.