En conexion cu dia di medio ambiente, Serlimar S G conhuntamente cu Bureau City Inspector y DOW tabata den accion di mainta trempan cu limpieza den bario di Village na San Nicolas. Despues di a ricibi varios peticion di residentenan di Village, a tuma e iniciativa aki pa haci e bario completamente limpi, cual a sosode diamars riba dia di medio ambiente. Serlimar S G a pone containernan disponibel den bario di Village pa residentenan por a tira nan desperdicio afo. Tambe tabata tin un team di Serlimar S G cu a subi caya for di 6’or di mainta conhuntamente cu e team di Bureau City Inspector y DOW, pa pasa na diferente cas pa yuda deshaci di e desperdicionan.
Parti di e plan di accion di limpieza den Village tabata pa basha dos propiedad abou den estado deplorabel. E casnan aki a bira casnan pa adictonan, cu a trese hopi problemanan social den e bario, caminda cu un di e casnan a wordo sendi na candela anteriormente. Tur esaki ta trese peliger pa e residentenan, specialmente e muchanan y adolescente di bario, cu lo lanta den presencia di cas di adicto. Esaki por tin efecto negativo riba e pensamento y desaroyo pa futuro di e muchanan aki. Pa es motibo a haci e luga completamente limpi y awor tin mas espacio pa e muchanan por hunga sin peliger, caminda nan por sigui desaroya y ta orguyoso di nan bario Village – Sra. Robin-Ann Didder, Management Team di Serlimar S G, ta elabora.
Sra. Twyma van der Biezen, Marketing & Sales Manager di Serlimar S G ta splika cu; e accion di limpieza den Village ta forma gran parti di e trayecto pa cu e conscientisacion di maneho di desperdicio den e comunidad di Aruba. E meta principal ta pa informa comunidad den un forma positivo, cu e problema di desperdicio na Aruba ta uno grandi, pero cu esaki por wordo resolvi cu accionnan di limpieza manera den Village y cu trahando hunto sigur por logra esaki. E mensahe na nos comunidad ta, cu Serlimar S G ta ofrece diferente tipo di servicio pa haci limpieza grandi den barionan y cu comunidad por haci nan peticion via e plataforma di Infraruba of serca Serlimar S G mes.
Serlimar S G, Bureau City Inspector y DOW lo sigui traha hunto pa continua cu accion di limpieza grandi no solamente den bario di Village, pero tambe den otro barionan na Aruba cu tin mester di e ayudo pa combati e problema di desperdicio. Den 2018 lo tin mas accion similar den luna di Augustus, September y October caminda lo bay otro barionan pa haci limpieza completo manera a tuma luga na Village. Pa haci peticion pa bo bario tambe bin na remarca pa Serlimar S G haci un limpieza completo, por manda peticion via email na [email protected], of tuma contacto cu nos riba Facebook Messenger. Tambe por tuma contacto pa mas informacion cu nos Marketing & Sales Department na telefon +297 5245080. Bishita nos website oficial di Serlimar S G riba www.serlimar.aw of sigui nos ariba Facebook @serlimararuba pa keda na altura di nos productonan y servicionan y tambe proyectonan den nos comunidad.