Serlimar Sui Generis ta conoce su director nobo

Serlimar Sui Generis como un compania estatal tin e responsabilidad importante di e maneho di desperdicio y alaves proteccion di nos medio ambiente.
Drentando den un era nobo unda e maneho y procesamento di desperdicio y desaroyo di strategianan sostenibel a bira un prioridad pa Aruba, Serlimar S G tin mester awor di liderazgo nobo cu mester tin e preparacion y experiencia necesario pa atende cu e retonan actual y di futuro. Despues di un proceso di solicitud habri cu a inicia na mei e aña aki, orguyosamente awe Serlimar S G por anuncia cu a apunta Sr. Henley Davelaar pa ocupa e funcion di director nobo di e compania, entrante 23 di october.
E lo ta e persona cu lo tin e responsabilidad pa guia e compania y su staff cu e vision nobo y implementa e metanan cu ta inclui entre otro; e expansion di e servicionan di Serlimar S G.
EXPERTICIO
Sr. Henley Davelaar ta un experto den Economia y Finanzas. El a nace na Corsow y eynan el a finaliza su estudionan na nivel di HAVO. Despues el a continua su estudionan avanza na Hulanda. Trempan den su carera el a gana hopi bon experiencia trahando den e sector di “offshore” y a specializa den “Venture funds” y “Mutual funds”.
El a ocupa posicionnan gerencial importante den e sector Textil, Software, IT, sector Petrolero y den Telecomunicacion. Recientemente na Boneiro, Sr. Davelaar a traha hopi di cerca cu e autoridadnan Hulandes riba e parti di maneho di medio ambiente y di desperdicio.
Hunta di Supervicion di Serlimar S G ta masha contento di por bay conta cu un profesional di e caliber di Sr. Henley Davelaar den e posicion importante aki. E ta stima Aruba, desde chikito e tabata gusta bishita nos isla constantemente. Hunta di Supervicion di Serlimar S G ta satisfecho con e proceso di solicitud a cana y e desicicion tuma, cual ta inspira confiansa.
Cu e nombramento aki, Serlimar S G kier garantiza su clientela y e pueblo di Aruba cu compania lo bay funciona cu un maneho basa riba Inovacion y servicio di calidad na bienestar di henter nos comunidad.

 

Comments

comments