Tampoco lo no sortia of procesa desperdicio na ex-edicifio DTI
ARUBA- Recientemente tin hopi comocion y confucion relaciona cu e topico di mudamento di
Serlimar S G pa e ex-edificio di DTI na Pos Chiquito. Diferente canalnan di media ta publicando
noticia tocando e topico aki, pero varios ta publicando informacion incorecto y ta causando panico y
confucion entre nos comunidad, specialmente e habitantenan di Pos Chiquito. Serlimar S G a sigui
tur e desaroyonan aki di serca y ta desapunta den e forma cu a scohe pa trose informacion y publica
noticia falso, sin cu a acudi na Serlimar S G mes pa verifica e desaroyonan actual.
Serlimar S G kier informa e comunidad di Aruba cu informacion corecto y concreto pa locual ta trata
uzo di ex-edificio di DTI. E plan cu tin actual ariba mesa pa locual ta trata e oficinanan di ex-edificio di
DTI, ta pa muda e departamentonan no-operacional di Serlimar S G entre otro; Helpdesk,
Secretariaat, Marketing & Sales, Finansas, Human Resources y Concierge pa asina por ubica mas
central di nos clientenan y principalmente e comunidad. Departamentonan operacional manera
Containerpark, Afvalinzameling y departamento di maneho Parkietenbos no lo muda pa Pos
Chiquito. E parti di e edificio aki lo wordo comparti cu Bureau City Inspector (BCI), mirando e echo cu
tur dos departamento ta trahando hunto pa combati e problema di desperdicio y ta organisando
limpiezanan grandi den diferente barionan na Aruba.
Pa locual ta trata e keuringslokaal bieu, tin un plan pa transforma esaki den un “recycle-drop off-
center”, esaki no ta un planta caminda desperdicio lo wordo deposita, ni separa, ni procesa.
Tampoco e lo ta e sitio caminda trucknan di Serlimar S G lo trece desperdicio. Esakinan ta
informacionan incorecto cu Serlimar S G ta condena, pa e simpel echo cu e Landsverordening di
Serlimar S G y nos leynan no ta permiti pa desaroyonan di tal forma tuma luga den un area habita. E
gastonan envolvi pa huur e edificio aki ta wordo considera como un invercion pa cu desaroyonan di e
compania Sui Generis y no ta un punto cardinal cu lo stroba e proceso di mudamento.
Kico ta un “recycle-drop off-center”?
Un “recicle-drop off-center” ta un centro caminda nos comunidad boluntariamente por deposita nan
desperdicio reciclabel di cas y asina contribui na un maneho responsabel pa yuda reduci e cantidad
di desperdicio innecesario cu tin actualmente tur caminda benta riba nos isla. Desperdicio reciclabel
cu por wordo entrega na e centro ta material manera; papel of carton, bleki di metal, boter di glas,
plastic number 1,2,4 y 5, textil y tambe palo. Tur e material cu wordo entrega lo mester cumpli cu e
reglanan di e centro prome cu wordo deposita den e bakinan, por ehempel; tur bleki, boter di glas y
plastic mester ta limpi, e cantidad di material cu ta wordo deposita tambe lo wordo controla. Esaki
ta nifica cu tur material cu ta drenta e centro lo wordo controla pa contaminacion prome cu e wordo
deposita, pa asina e proceso di reciclahe no wordo tranca. Esaki ta un di e disciplinanan di un
“recycle-drop off-center” cu na Aruba tambe mester cumpli cu ne. E motibo principal di Serlimar S G
pa introduci e concepto di reciclahe, ta cu Parkietenbos a yega su capacidad pa carga e desperdicio
di Aruba y nos no por sigui maneha deperdicio manera 30 aña pasa. Reciclahe ta un di e metodonan
mas uza internacionalmente pa maneha y reduci desperdicio na un forma responsabel y a yega e
tempo pa Aruba tambe adopta esaki.
Serlimar S G ta na altura di tur e desaroyonan cu mester tuma luga pa locual ta trata e introduccion
di un programa di reciclahe y ta trahando duro pa introduci e metodo aki na un forma corecto y
responsabel. Pa mas informacion tocante e topico di reciclahe of e centro di reciclahe por tuma
contacto cu Serlimar S G na 5245080 of manda un mensahe riba Facebook Messenger.
Zona de los archivos adjuntos