Serlimar cu campaña di conscientisacion durante temporada di campamento

Durante un encuentro cu prensa, Sra. Twyma v/der Biezen, Relacionista Publico di Serlimar SG a splica encuanto e rol di Serlimar den cuadro di e temporada di campamento 2019.

E puntonan di enfoke di Serlimar pa e temporada aki ta e.o. conscientisacion unda cu lo hiba campaña cu lo bay enfatisa ariba e habito di reduci, reuza y recicla. Esaki tin como meta principal di tene nos beachnan limpi, vooral den tempo di campamento. Un otro punto ta cu Serlimar lo sigui ofrece nan servicio, di coleccion di desperdicio y tambe nan containernan, pa esunnan cu ta campa den e temporada aki, pa asina evita y reduci e cantidad di sushedad cu lo por bay ariba nos beachnan y tambe den nos lama.
Tambe e parti di accesibilidad general cu Serlimar ta ofrece tur aña, unda cu ta pone diferente containernan na diferente areanan di campamento, cu e publico en general por haci uzo di dje, door di tira e sushi cu mester deshaci di dje, na un forma responsabel y asina aki tambe cumpli cu e meta principal pa sigui proteha y sigui mantene e beachnan limpi. E aña aki e campaña di conscientisacion ta tips pa campamento dushi sin sushi. Esaki ta focus hopi ariba e parti di reduci e parti di sushedad ariba nos beachnan, unda cu ta informa cu simplemente e uzo di un saco di sushi y e tiramento di sushi den e bari ta importante. Asina ta evita cu e sushi ta keda ariba nos beach. E parti di uza materialnan reusabel, cu ta indica tambe cu ta reduci e ora e cantidad di sushi cu ta acumula durante e temporada di campaña y otro parti ta recicla. E aña aki lo continua cu Plastic Beach Party y tambe ATA den e iniciativa di recycle bin den varios area di e beach cu hende por uza pa recicla glas, plastic y tambe papel.
E aña aki nan a bin cu promocion di e servicio di mini container cu ta e 240 L, pa solamente 10 florin. E suma aki ta inclui tambe, servicio di coleccion di desperdicio di tur dia. Esaki ta nifica cu Serlimar ta pasa recoge sushi di tur esunnan cu ta huur e containernan, tur dia, na tur e areanan di campamento. Tambe nan tin nan mini container un poco mas grandi di 1100 L, pa 50 florin, cu ta pa full e temporada. Den e prijs ta inclui tambe e servicio di recogemento di sushi, tur dia.
Pa mas informacion di esaki, pro tuma contacto cu Serlimar na 524-5080 y tambe pa reserva.
Importante ta tambe e containernan cu Serlimar lo bay ubica. Un di e areanan ta Zwarte Mangel (pariba di KIA), Baby Beach y Eagle Beach. Ta trata di e containernan grandi di 30 yarda. Y esaki ta bay duna servicio, cada pasa 2 dia durante full e temporada di campamento. Asina publico en general, pa asina esunnan cu ta campamento, toch por deshaci di nan desperdicionan.
Serlimar ta focus hopi ariba mantene Aruba limpi. Y durante campamento esaki ta hopi importante pa nos beachnan. Tin hopi hende cu ta haci uzo di e oportunidad di bay disfruta di nan temporada liber na beach. Naturalmente, ora ta bay un caminda pa disfruta y gosa di cierto evenemento, hopi sushi ta wordo colecta. P’esey tambe ta pone containernan y barinan di sushi y tambe saconan cu ta bay parti, conhuntamente cu Bureau City Inspector, pa asina tur hende deshaci di nan sushi na un forma responsabel, tambe pa cuida nos beachnan. Tabata palabranan di Sra. Twyma v/der Biezen, Relacionista Publico di Serlimar SG.

Comments

comments