Den un entrevista cu Sr. Davelaar director di Serlimar e ta informa cu manera custumber e oficinan di Serlimar lo sera entrante 20 di December y ta habri bek dia 6 di Januari 2020. E parti operacionnan di recoge sushi si ta sigui normal pues tur cliente cu mester di servicionan di oficina mester acudi prome cu e fecha aki p’asina por wordo atendi. Sr. Davelaar a mustra cu un di e proyectonan exitoso di Serlimar e aña aki tabata Milieustraat cu a demostra cu tin necesidad pa cu esaki p’asina comunidad haci uso di e oportunidad aki pa hiba nan sushinan na un lugar central y mas serca di nan cas y asina mantene Aruba limpi y rond di nan cas limpi tambe. Y sigur sigur ta un proyecto cu lo mira continuidad den 2020. Pa loke ta e resto di aña’ki tin tres fecha mas di Milieustraat cu ta Diasabra dia 7 di December na veld di Universal na Pos Chikito, Diadomingo dia 8 di December na Sanicolas dilanti di Aruba Store y e ultimo ta Diadomingo dia 15 di December na Centro Deportivo Rooi Afo na Paradera. Pues probecha di esakinan pa haci bo cas paden y rond pafo limpi hibando sushi na e bakinan disponibel. Ta urgi tur hende pa registra mas pronto posibel na Serlimar p’asina e ploegnan por pasa y recoge sushi na bo cas y hiba esaki gratis pabo na e bakinan disponibel tambe. Den mesun rosea director di Serlimar a mustra cu pa loke ta e dianan di fiesta venidero e schedule pa recogemento di sushi na cas lo conoce cambio manera ta custumber. Pa loke ta fecha 25 y 26 di December Serlimar lo no recoge sushi di cas ya cu su trahadonan ta liber e dianan ey pero lo “haal in” prome y despues. Mescos e siman di aña nobo lo tin e mesun forma di recoge sushi di cas pero pa loke ta sushi comercial y pa esnan cu ta paga pa recoge sushi, esakinan lo continua normal riba e dianan di fiesta. Pa loke ta e Upcycle Centrum di Serlimar, Sr. Davelaar a mustra cu e reaccionnan ta fenomenal y vooral den e parti di palo caminda cu habitantenan ta trece nan resto di palonan cu ta haciendo e servicio aki un exito rotundo. Manera ta conoci e resto di palonan aki ta wordo converti den mueblenan bunita y Sr. Davelaar a mustra cu nan tin mannan yen pa cumpli cu e demanda cu tin pa cu e resultado final di material cu ta wordo hiba e Upcycle Centrum aki cu normalmente lo wordo benta afor y awo ta wordo usa pa comberti den mueblenan masha bunita mes. Pa loke ta e rotonde di Pos Chikito, segun Sr. Davelaar ta bisa di ta contento, cu ta usando meublenan traha den e Upcycle Centrum pa decora e retonde ki pa e periodo di fin di aña’ki. Diahuebs dia 12 di December Serlimar lo inaugura e retonde aki y lo tin animacion di Banda La Paranda. Pa loke ta fin di aña director di Serlimar a mustra cu nan tin campaña di fin di aña y asina lo kier duna bek na e clientenan cu henter aña ta fiel na Serlimar y si logra paga factura completo pa e aña’ki lo bai cai den un sorteo pa gana sumanan di placa. Pues pasa na cualkier sucursal di Serlimar cu tin uno den casi tur bario y asina registra y paga bo facturanan y asina ta den wega pa e campaña di fin di aña. Sr. Davelaar a duna di conoce cu ta hopi importante pa tur hende compronde cu Serlimar ta haciendo un trabao duro p’asina sigura un bon medio ambiente riba nos isla. “Mi ta haci uso di e oportunidad aki pa gradici pueblo di Aruba pa e manera cu a intercambia e aña’ki y manera cu nan a presencia na tur actividad organiza pa Serlimar manera e open house. Mi ta kere cu e compromiso ta pa den 2020 nos haci e lazo aki aun mas fuerte y mi kier tuma tempo tambe pa gradici tur nos empleadonan pa e tremendo team work y tremendo trabao cu nan tur ta bin ta haciendo. Cada uno den nan funcion y mi ta gradici nan pa cu esaki y gradici pueblo di Aruba y for di akinan mi kier desea henter pueblo di Aruba feliz dianan di fiesta y haci tur loke bo tin cu haci den forma responsabel y Serlimar tey pa haci esaki posibel”, Sr. Davelaar director di Serlimar a declara.